Кафэ ў Калееўцах змянілася непазнавальна (+фота)


Пастаўскія прадпрымальнікі Валянцін і Ірына Пакашаван даўно марылі пра арганізацыю грамадскага харчавання. І нарэшце ажыццявілі задуманае — у пачатку года набылі прыватнае кафэ ў Калееўцах і змянілі яго непазнавальна.

У кожнага гаспадара сваё  бачанне справы і свае падыходы. Новыя ўлас­нікі кафэ вырашылі зрабіць у ім усё па-новаму. Валянціну даводзі­лася бываць у Літве, Латвіі, Польшчы, Францыі. Многае з убачанага там ён прыўносіць зараз у сваю справу. Інтэр’ер кафэ зменены кардынальна. Яно аформлена ў самым сучасным стылі. Падлогу выклалі прыгожай пліткай, перафарбавалі сцены, замянілі барную стойку, сталы, крэслы. У зале і на кухні ўстанавілі кандыцыянеры. Новыя халадзільнікі і халадзільныя вітрыны, кавамашына з ­італьянскай кавай, фрызер для прыгатавання мяккага марожанага. Да канца жніўня будзе абсталяваны віп-пакой, разлічаны на 10-15 чалавек, з танцполам і светламузыкай.

Мяняецца прылеглая тэрыторыя. Уздоўж дарогі высаджаны туі. Зялёная агароджа захіне ад пылу. Пад яркім “парасонам” выстаўлены столік і крэслы (для жадаючых падсілкавацца на свежым паветры). У бліжэйшы час з’явяцца арыгінальныя альтанкі, арэлі, а таксама прыцягальная шыльда “До зари”. Менавіта такую назву атрымала кафэ, бо яно працуе кругласутачна. “Цікавых задум у нас яшчэ шмат, — адзначаюць уласнікі. — Але раскрываць пакуль не будзем. Зробім — прыедзеце паглядзець”.

Паколькі кафэ прыдарожнае (знаходзіцца на трасе граніца Літвы—Полацк—Віцебск), большасць наведвальнікаў, вядома ж, вадзіцелі, у асноўным — “дальнабойшчыкі”, але і расіян, літоўцаў, латышоў, нават немцаў, якія праязджаюць па трасе, шмат. “Усе яны павінны сытна паесці і застацца задаволены, — пераканана адміністратар Таццяна Аркадзьеўна Гладковіч. — У нас няма заморскіх далікатэсаў. Перавагу аддаём простым беларускім стравам. Усе яны вельмі смачныя. Напрыклад, гарачынёй запатрабаваны халаднік. Любяць кліенты нашу фірменную салянку, яечню з каўбасой і бульбай, якую падаём на індывідуальнай патэльні. У выхадныя дні прапануем шашлыкі, рульку, цапяліны з мясам. Наведвальнікі прыемна здзіўляюцца, калі даведваюцца, што ў нас і ноччу можна заказаць такія ж стравы, як і днём”.

Тут абавязкова ўлічваюць  пажаданні наведвальнікаў, пастаянна ўносяць змяненні ў меню. Ёсць прахаладжальныя напіткі, а для тых, хто прыязджае адзначыць якую-небудзь падзею ці проста адпачыць, немалы выбар він, каньякоў, іншых спіртных напояў.

Вельмі многае залежыць ад абслуговага персаналу. Нам прыемна было назіраць за працай добразычлівых, усмешлівых бармэна Вольгі Канаш і афіцыянткі Насці Дулінец.

Бармэн Вольгі Канаш і афіцыянтка Насця Дулінец.

Повар Алена Мацур прызналася, што атрымлівае ад працы задавальненне, бо добрыя ўмовы: усё кухоннае абсталяванне новае, прадукты свежыя і якасныя, графік работы зручны. Агульныя складальнікі поспеху — смачныя стравы і высокая культура абслугоўвання.

Повар Алена Мацур

 Знаёмімся з некаторымі наведвальнікамі. Мінчанка Кара­ліна Стасюк з дзвюма дачушкамі заехала сюды ўпершыню. Частуюцца сокамі, марожаным. Ім даспадобы інтэр’ер, прыемная прахалода ў зале, смачнае марожанае.

Караліна Стасюк з дзвюма дачушкамі

Вадзіцелі Ілья, Міхаіл, Генадзій, Ахмед — калінінградцы. Са свайго горада вязуць грузы ў Маскву. У кафэ не ўпершыню. Задаволены і сталаваннем, і абслугоўваннем.

Вадзіцелі Ілья, Міхаіл, Генадзій, Ахмед.

У кнізе водгукаў (у абноўленым выглядзе кафэ працуе ўсяго два месяцы) з’явіліся першыя падзякі. Не магу не агучыць і такі факт, пачуты ад аднаго вадзіцеля-“дальнабойшчыка”: “У Вільнюсе мне па рацыі перадалі: “На Пастаўшчыне ёсць кафэ са смачнымі стравамі і прыемным абслугоў­ваннем”. Пераканаўся, што гэта сапраўды так. Цяпер перадаю інфармацыю іншым”.

Нездарма ў кафэ іншы раз нават утвараюцца чэргі. А гэта і ёсць найвышэйшая ацэнка работы як гаспадароў, так і ўсяго калектыву.

Фаіна КАСАТКІНА, Уладзімір КАЛІБАТАЎ (фота).



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.