Новыя таленавітыя галасы ад прафсаюза

Культура

Пераможцы Вольга Толсцік, Сяргей Казура і Яўгенія Бяляўцава.

Фэдэрацыя прафсаюзаў Беларусі выступіла ініцыятарам правядзення рэспубліканскага маладзёжнага вакальнага конкурсу “Новыя імёны Беларусі”. Конкурсная праграма, якая раздзелена на тры этапы, праходзіць пад знакам Года моладзі. Першы этап — раённы. Прайшоў ён і ў Паставах.

— Галоўная мэта конкурсу, — гаварыла старшыня Пастаўскага раённага аб’яднання прафсаюзаў Іна Далецкая, — прыцягнуць да ўдзелу ў ім маладых людзей (ад 16 да 31 года), членаў прафсаюза, з працоўных калектываў і адкрыць новыя таленты, стварыць найлепшыя ўмовы для раскрыцця іх творчых здольнасцей, прапагандаваць сярод моладзі здаровы лад жыцця.

За кароткі тэрмін пярвічным прафсаюзным аргані­зацыям устаноў, прадпрыемстваў трэба было адабраць на конкурс прадстаўнікоў ад сваіх калектываў. Заяўку на праслухоўванне падалі дваццаць вакалістаў-аматараў. Актыўнасць праявілі прафсаюзныя арганізацыі адкрытага акцыянернага таварыства “Камайскі-агра”, якое прадстаўлялі Мікалай Юдзін, Дзіяна Півавар і Юлія Селі­вёрстава, ясляў-сада № 1 (Наталля Казаровец і Карына Мурзёнак). Не засталіся ўбаку і старшыні прафкамітэтаў з Варапаеўскай дыстанцыі пуці, СШ № 4, райспажыўтаварыства, цэнтра культуры і народнай творчасці, Варапаеўскай раённай бальніцы, прафтэхкаледжа, ААТ “Паставымэбля”, раённай бібліятэкі, УП ЖКГ, раённага Дома культуры, ААТ “Кураполле-агра”, гонар якіх абаранялі Надзея Кімбар, Вікторыя Корзан, Таццяна Пронька, Дзяніс Круглоў, Таццяна Карпава, Ірына Мяжэніна, Аляксандр Макаранка, Дзмітрый Ракоўскі, Анастасія Пашкова, Сяргей Казура, Вольга Толсцік і Яўгенія Бяляўцава.

— Людзі розных прафесій (медыкі, прадаўцы, бухгалтары, слесары, аператары машыннага даення)  і з рознымі здольнасцямі выходзілі на сцэну, — гаварыла член журы выкладчыца дзіцячай школы мастацтваў імя А. Тызенгаўза Жанна Гучык. — Але іх выступленні краналі душу. Узровень многіх вакалістаў высокі, большасць змаглі перадаць эмоцыі і пачуцці праз песні. Адчувалася, хто з мікрафонам на ты і выступае ўпэўнена, а хто на вялікую сцэну выйшаў упершыню, і такім было складана расслабіцца, прадэманстраваць свой артыстызм. Стараліся ж  усе.

Конкурс сапраўды адкрыў новыя імёны талена­вітых маладых людзей. Эстрадныя, народныя, бардаўскія песні гучалі на беларускай, рускай і нават англійскай мовах. Разнастайнай была і іх тэматыка: вайна, каханне, любоў да роднай Беларусі. Члены журы, у склад якога ўвай­шлі старшыня Пастаўскага раённага аб’яднання праф­саюзаў Іна Далецкая, намеснік начальніка ад­дзела ідэалагічнай работы, культуры і па справах моладзі райвыканкама Ірына Лойка, кіраўнік вакальна-інструментальнага ансамбля “Скіфы” Віктар Верацельнікаў, выкладчыца дзіцячай школы мастацтваў імя А.Тызенгаўза Жанна Гучык і спецыяліст па вакальна-харавым жанры цэнтра культуры і народнай творчасці Аксана Нікалаева, доўга раіліся, бо ім было вельмі складана выбраць лепшых з лепшых.

Усе канкурсанты атрымалі сертыфікаты ўдзельні­ка конкурсу. Прафсаюзныя арганізацыі, членамі якіх яны з’яўляюцца, адзначаць іх і матэрыяльна. А пераможцамі сталі Сяргей Казура з унітарнага прадпрыемства “Жыллёва-камунальная гаспадарка Пастаўскага раёна”, Вольга Толсцік з раённага Дома культуры і Яўгенія Бяляўцава з ААТ “Кураполле-агра”. Яны ўзнагароджаны дыпломамі раённага аб’яднання прафсаюзаў і грашовымі прэміямі па 500 тысяч рублёў.

Прыемна было бачыць у зале не толькі старшынь прафсаюзных арганізацый, прадстаўнікі якіх выступалі на сцэне, але і многіх кіраўнікоў, а таксама групу падтрымкі з цэнтральнай раённай бальніцы.

— Упэўнена, што нашы пераможцы годна прадставяць раён на абласным конкурсе, — сказала ў заключэнне Іна Далецкая. — А многія з канкурсантаў будуць запрошаны работнікамі культуры да ўдзелу ў розных святочных канцэртах, якія будуць праходзіць у раёне.

Анна АНІШКЕВІЧ.

Фота аўтара.

 



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.