З аўтакрэсламі і на зімніх шынах



16 студзеня ўступіў у сілу Указ Прэзідэнта Рэспублікі Беларусь №483, які ўнёс змяненні і дапаўненні ва Указ ад 28 лістапада 2005 года № 551 “Аб мерах па павышэнні бяспекі дарожнага руху”. Новы дакумент закрануў многія главы Правілаў дарожнага руху. Сярод іх — перавозка дзяцей у аўтамабілях, абсталяваных рамянямі бяспекі, і выкарыстанне вадзіцелямі зімніх шын. Гэтыя актуальныя пытанні сталі тэмай гутаркі карэспандэнта “ПК” з начальнікам аддзялення ДАІ РАУС Д. М. АНДРОНАМ.

Дзмітрый Мікалаевіч, раскажыце, якія канкрэтна змяненні ўнесены ў дзеючыя Правілы.

— У адпаведнасці з імі, у перыяд з 1 снежня па 1 сакавіка на аўтамабілях з тэхнічна дапушчальнай агульнай масай да 3,5 тоны ўключна, легкавых і грузапасажырскіх аўтамабілях масай звыш 3,5 тоны, а таксама на аўтобусах масай да 5 тон прадугледжваецца абавязковае выкарыстанне зімніх шын. Яны ўстанаўліваюцца на ўсіх колах транспартнага сродку, павінны мець спецыяльныя значкі, якія абазначаюць, што гэта менавіта зімняя рызіна, і астатак пратэктара не менш за 4 міліметры.

Што датычыць перавозкі дзяцей, то яна павінна ажыццяўляцца з выкарыстаннем дзіцячых утрымліваючых устройстваў — аўтакрэслаў, якія адпавядаюць вазе і росту дзіцяці, — калі яму да 5 гадоў. Або іншых сродкаў: бусцераў, спецыяльных падушак для сядзення, дадатковых ся­дзенняў, якія дазваляюць бяспечна прышпіліць дзіця з дапамогай рамянёў бяспекі, прадугледжаных канструкцыяй транспартнага сродку, — калі дзіцяці ад 5 да 12 гадоў. Дапускаецца перавозіць дзяцей ва ўзросце да 12 гадоў без выкарыстання названых вышэй устройстваў у тым выпадку, калі рост дзіцяці перавышае 150 сантыметраў, а таксама ў аўтамабілі-таксі.

— Чым выклікана прыняцце новага Указа?

— У першую чаргу, дастаткова вялікай колькасцю дарожна-транспартных здарэнняў і траўміраваных у іх, у тым ліку дзяцей. У 2014 годзе на тэрыторыі Рэспублікі Беларусь дзеці сталі ўдзельнікамі 429 ДТЗ, у якіх 30 непаўналетніх загінулі, 434 атрымалі раненні. На тэрыторыі Віцебскай вобласці з удзелам дзяцей зарэгістравана 30 ДТЗ, у выніку іх 4 загінулі і 35 атрымалі траўмы. У нашым раёне адбыліся 2 дарожна-транспартныя здарэнні, у якіх 2 дзяцей былі паранены, прычым адно — з-за таго, што яго бацька не “пераабуў” на зіму аўтамабіль.

— Якая адміністрацыйная адказнасць прадугледжана за парушэнне новых правілаў?

— Згодна з артыкулам 18.14, частка 5 Кодэкса аб адміністрацыйных правапарушэннях Рэспублікі Беларусь, за парушэнне правілаў перавозкі дзяцей вадзі­цель можа атрымаць папярэ­джанне або штраф у памеры да 4 базавых велічынь. Калі ж такое правапарушэнне здзейснена паўторна на працягу года, давядзецца заплаціць штраф у памеры ад 2 да 8 базавых. Невыкарыстанне на аўтамабілях зімніх шын у перыяд з 1 снежня па 1 сакавіка караецца папярэджаннем або штрафам у памеры да 2 базавых велічынь (арт. 18.12, ч.3 КаАП РБ). Пры паўторным на працягу года пасля накладання адміністрацыйнага спагнання за гэта ж парушэнні — штрафам у памеры ад 2 да 5 базавых.

— Ці ўсе вадзіцелі на Пастаўшчыне выконваюць патрабаванні новых правілаў?

— Нягледзячы на тое, што з моманту падпісання Указа Прэзідэнтам да ўступлення яго ў законную сілу прайшло тры месяцы і ў вадзіцеляў быў час азнаёміцца з ім і прыняць адпаведныя меры, зрабілі гэта далёка не ўсе. Па перавозцы дзяцей пратаколаў на першым часе мы не складалі, абмяжоўваліся прафілактычнымі гутаркамі з бацькамі.  Але сёння да адміністрацыйнай адказнасці прыцягнуты ўжо 5 чалавек. А вось да тых, хто так і не “пераабуў” свой аўтамабіль у зімнюю рызіну, падыходзім больш строга. Складзена ўжо 25 пратаколаў, частка вадзіцеляў аштрафавана. Работу па выяўленні парушальнікаў на дарогах бу­дзем працягваць і далей.

Карыстаючыся магчымасцю, хачу звярнуцца таксама да пешаходаў і нагадаць пункт 17.2 Правілаў дарожнага руху. У адпаведнасці з ім, пераходзіць праезную частку дарогі можна толькі па пешаходным пераходзе, папярэдне пераканаўшыся ў тым, што выхад на яе бяспечны. Да таго ж старайцеся не затрымлівацца на дарозе. Чым хутчэй вы яе пакінеце, тым меншую перашкоду створыце для вадзіцеляў.

Алена ШАПАВАЛАВА.

 



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.