У Пастаў прыбавілася пабрацімаў

Местная власть

Незалежная, самастойная Беларусь падтрымлівае дыпламатычныя адносіны больш чым са 170 краінамі свету. Штогод расце колькасць гарадоў-пабрацімаў. Не выключэнне і Паставы, дзе нядаўна падчас міжнароднага свята музыкі прайшоў шэраг дзелавых сустрэч.

У наш горад прыехалі не толькі ўдзельнікі фестывалю, кіраўнікі творчых калектываў, але і афіцыйныя дэлегацыі гарадоў Пушкіна, Смаленск і Невель (Расійская Федэрацыя),  Рэзекне і Віесітэ (Латвійская Рэспубліка), Швянчоніс, Купішкіс, Шырвінтас, Рокішкіс, Малетай (Літоўская Рэспубліка), Йыхві (Эстонская Рэспубліка). Яны прысутнічалі на фестывальных выступленнях, прэс-канферэнцыі, азнаёміліся з работай акцыянерных таварыстваў “Пастаўскі малочны завод” і “Паставымэбля”, былі запрошаны на прыём з нагоды падпісання дагавора паміж Пастаўскім раёнам і Віесіцкай краявой думай Латвіі.

Падчас цырымоніі адзначалася, што кіраўніцтва нашага раёна вядзе актыўную работу па ўсталяванні сяброўскіх, добрасуседскіх адносін, культурных і дзелавых кантактаў з гарадамі і іншымі суб’­ектамі кіравання не толькі суседніх краін, але і далёкага замежжа. Пабрацімамі Пастаў з’яўляюцца дванаццаць гарадоў Расійскай Федэрацыі, Поль­шчы, Прыбалтыкі, Італіі і Іспаніі. Глыбока сімвалічна, што супрацоўніцтва з многімі замежнымі краінамі пачыналася дзякуючы культурным сувязям і непасрэдна Міжнароднаму фестывалю народнай музыкі “Звіняць цымбалы і гармонік”. Вось і ў заключны дзень сёлетняга музычнага форуму свае подпісы пад дагаворамі паставілі кіраўнік раённай вертыкалі Віктар Гутараў і мэр Віесіцкага муніцыпалітэта Яніс Дзімітрыеўс.

— Нам вельмі прыемна, што з кожным годам расце колькасць латышскіх самадзейных мастацкіх калектываў, якія даўно ўдзельнічаюць у фестывалі, — падкрэсліў В. Гутараў. — Пашыраецца і геаграфія прадстаўніцтва. З сённяшняга дня нашым афі­цыйным партнёрам з’яўляецца горад Віесітэ. Упэўнены, што заключэнне дагавора надасць імпульс наладжванню кантактаў ва ўсіх сферах жыцця, будзе са­дзейнічаць моцнаму сяброўству, дзелавому супрацоўніцтву.

— Віесітэ мае гарады-пабраці­мы ў Літве, Даніі, Польшчы і ва Украіне, — адзначыў Яніс Дзімітрыеўс. — Цяпер, як да сваіх, будзем ехаць і ў Беларусь  — у Паставы. Перакананы, што, пазнаёміўшыся бліжэй, розныя структуры гарадоў змогуць наладзіць непасрэдныя кантакты, знойдуць агульныя інтарэсы, якія стануць карыснымі для абодвух бакоў.

Падпісанне дагавора аб супрацоўніцтве вітала консул, кіраўнік консульства Латвійскай Рэспублікі ў Віцебску Дагнія Лацэ-Атэ. Асаблівую ўвагу яна звярнула на тое, што кантакты наладжваюцца на ўзроўні самакіраванняў, бакі самі вызначаюць магчымыя шляхі супрацоўніцтва, дзейнічаюць самастойна. Такія сувязі на практыцы аказваюцца самымі моцнымі і карыснымі.

Падчас фестывалю адбылася яшчэ адна падзея, якая ўвойдзе ў яго гісторыю.  Перад пачаткам гала-канцэрта ў гарадскім парку старшыня раённага выканаўчага камітэта Віктар Гутараў і народны артыст Беларусі, прафесар, мастацкі кіраўнік Нацыянальнага аркестра імя І. Жыновіча Міхаіл Казінец  урачыста адкрылі памятны знак, прысвечаны гарадам-пабрацімам. Ён уяўляе сабой вялізны валун, на якім прымацаваны гранітныя шыльды з гербамі і назвамі гарадоў-пабрацімаў.

 

Аляксандр Фінскі

Гэта вынік сумеснай работы  скульптараў Аляксандра Фінскага, Андрэя Суднікава і спецыялістаў таварыства «ПастКамень». Дарэчы, на цырымоніі ўзнага­родж­вання шмат удзячных слоў было сказана ў адрас Аляксандра Міхайлавіча. Дзякуючы яму і студэнтам Беларускай дзяржаўнай акадэміі мастацтваў у гора­дзе з’явілася некалькі цікавых скульптурных кампазіцый.

Тэкст і фота Пятра КУРЫЛОВІЧА.



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.