Сама больш — першакласнікаў (+фота)

Образование

У сярэдняй школе №2 у першыя “А” і “Б” класы сёлета залічана 55 хлопчыкаў і дзяўчынак. Іх прынялі вопытныя педагогі Іна Леанідаўна Курдо і Ірына Анатольеўна Собаль. Як клапатлівыя маці, яны ні на крок не адыходзілі ад сваіх выхаванцаў, якія на свяце ведаў былі ў цэнтры ўвагі.  Па традыцыі выпускнікі павязалі ім стужкі перша­класніка і ўручылі падарункі ад Прэзідэнта Рэспублікі Беларусь А. Р. Лукашэнкі — ілюстраваныя кнігі “Беларусь — наша Радзіма”.

Першакласнікаў і ўсіх вучняў, настаўнікаў і бацькоў віталі дырэктар школы І. А. Мадвейка, начальнік аддзела арганізацыйна-кадравай работы райвыканкама У. З. Гутар, дырэктар філіяла “Аўтатранспартнае прадпрыемства №17” А. Д. Малахаў, настаўніцы пачатковых класаў І. Л. Курдо І. А. Собаль і іншыя.

Дзякуючы шэфам і бацькам школа загадзя была падрыхтавана да новага навучальнага года і  гасцінна прыняла дзяцей, колькасць якіх кожны год павялічваецца. А гэта значыць, што ў навучальнай установе з’явіцца яшчэ больш тых, хто прыносіць ёй славу, радуе поспехамі і актыўнасцю ў вучобе, спорце, грамадскім жыцці. Асабліва ганарацца сваімі выхаванцамі настаўнікі Т. М. Захарэвіч, Г. К. Сініца, А. П. Дзеўгуць, А. М. Мачанская, Ф. У. Дзевятоўскі і іншыя. За апошнія пяць гадоў заваявана 38 дыпломаў рознай вартасці на другім (раённым) этапе  рэспубліканскай прадметнай алімпіяды, у тым ліку сёлета — 17. Высокай актыўнасцю  вызначаюцца рабяты і ў дыстанцыйных мерапрыемствах. Атэстаты асаблівага ўзору з уручэннем залатых медалёў атрымалі 7 выпуск­нікоў. Сёлета такой узнагароды ўдастоена Вікторыя Мурашкевіч. Яна, а таксама яшчэ 18 юнакоў і дзяўчат (68% ад усёй колькасці выпускнікоў школы) сталі студэнтамі вышэйшых навучальных устаноў краіны.

Цікава жывуць адны з самых мнагалікіх у раёне піянерская дружына школы і пярвічная арганізацыя БРСМ. Цэнтрам ваенна-патрыятычнага выхавання дзяцей розных узростаў і школ з’яўляецца музей баявой і працоўнай славы, якім кіруе старэйшы педагог Р. Н. Ластоўская. На рахунку навучальнай установы шмат іншых карысных спраў. З 1 верасня пачалі працаваць дзве про­фільныя групы фізіка-матэматычнага і хіміка-біялагічнага ўхілу. Заняткі вядуць найбольш вопытныя настаўнікі  А. Ю. Трубач, Т. І. Пракаповіч, А. М. Мачанская і І. П. Гутар.

Святочны настрой у прысутных стаў яшчэ больш радасным пасля таго, як школе былі ўручаны падарункі ад аўтатранспартнага прадпрыемства і раённага ад­дзялення Дэпартамента аховы —  ноўтбук і канцылярскія прылады, а таксама музычныя віншаванні ад аднагодкаў.

Першакласніца Рэната Бартось і выпускнік Андрэй Акялан абвясцілі званком аб пачатку новага навучальнага года. Затым ва ўсіх класах прайшоў урок  “На цябе, наша моладзь, надзея!”. Перад вучнямі выступілі класныя кіраўнікі, госці.

                    Тэкст і фота Пятра КУРЫЛОВІЧА.



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.