Каб добра жыць, трэба шмат працаваць

Местная власть

Cтаршыня раённага выканаўчага камітэта В. С. Гутараў з’яўляўся дэлегатам першага, чацвёртага і пятага Усебеларускага народнага сходу. Сёння Віктар Сяргеевіч дзеліцца з чытачамі газеты сваімі ўражаннямі ад гістарычнай падзеі і планамі на далейшае развіццё Пастаўшчыны.

— Удзел ва Усебеларускім народным сходзе — гэта вялікі гонар і адказнасць, бо маеш непасрэднае дачыненне да прыняцця важных дзяржаўных рашэнняў, ад якіх залежыць будучыня краіны. Ад нашага раёна ў яго рабоце ўдзельнічала 11 дэлегатаў, якія прадстаўлялі прамысловасць, аграрны сектар, культуру, медыцыну, адукацыю, іншыя сферы жыццядзейнасці. Уражанні ад такога маштабнага ўсенароднага форуму — а ў ім прымалі ўдзел дзве з паловай тысячы чалавек — самыя яркія. Найперш — ад прамовы Прэзідэнта, у якой ён падвёў вынікі сацыяльна-эканамічнага развіцця краіны на сучасным этапе, акрэсліў праблемныя пытанні і шляхі іх вырашэння.

Адзін з вызначальных момантаў такі: Аляксандр Рыгоравіч Лукашэнка паставіў пытанне, ці гатова беларускае грамадства да радыкальных крокаў, і адказаў на яго адмоўна — ні Урад, ні насельніцтва не гатовы да гэтага. Таму пастаўлена задача не рабіць рэзкай ломкі, а ўдасканальваць усё тое, што ўжо напрацавана. Але зразумела, што без новых падыходаў краіна не зможа развівацца. У гэтай сувязі вызначаны такія напрамкі, як аператыўнае кіраванне эканомікай, пошук новых рынкаў збыту, пашырэнне гаспадарчай самастойнасці. Асаблівая адказнасць ускладваецца на кіруючае звяно і непасрэдна на дзяржапарат, які пакуль што працуе неэфектыўна. Прэзідэнт запатрабаваў аптымізацыі дзяржапарату з такім разлікам, каб у ім засталіся людзі, здольныя зрабіць усё магчымае і немагчымае для таго, каб усе рашэнні, якія прымаюцца, былі выкананы. Скарачэнне, безумоўна, адбудзецца і ў нас. Але хачу прывесці факт, які сведчыць пра тое, што пастаўскія кадры дастаткова паспяхова спраўляюцца са сваімі абавязкамі. 29 чэрвеня адбылося пасяджэнне аблвыканкама, на якім разгледжана пытанне аб рабоце гарадскіх і раённых выканаўчых камітэтаў па выкананні прагнозных паказчыкаў сацыяльна-эканамічнага развіцця, павышэнні эфектыўнасці работы арганізацый, зніжэнні затрат. На ім адзначана, што найбольшай удзельнай вагі выканання даведзеных заданняў сёлета дабіліся ў вобласці Пастаўскі раён і горад Наваполацк. Але і свае праблемы мы бачым і будзем працаваць над іх вырашэннем.

Узровень жыцця людзей і развіццё сацыяльнай сферы ў першую чаргу залежаць ад эканомікі. На яе і была звернута асаблівая ўвага на Усебеларускім сходзе. Прэзідэнт заявіў: “Наша задача на бліжэйшыя пяць гадоў — пераадолець адставанне і трывала заняць сваю нішу ў сусветнай эканоміцы”. Праграмай на бягучую пяцігодку намечаны рост валавога ўнутранага прадукту, прадукцыйнасці працы і інвестыцый на 12—15 працэнтаў, экспарту — на 21—25 працэнтаў. Гэта не завоблачныя лічбы, але для іх дасягнення пастаўлена задача сканцэнтраваць усе рэсурсы на ключавых прыярытэтах — інвестыцыях, занятасці насельніцтва, экспарце, інфарматызацыі і моладзі.

Галоўнай крыніцай росту валавога ўнутранага прадукту з’яўляюцца эфектыўныя інвестыцыі. За пяцігодку ў краіне неабходна рэалізаваць больш за 80 буйнейшых інвестпраектаў на суму звыш 27 мільярдаў долараў.

За гэты час мы павінны выйсці на якасна новы ўзровень тэхналогій у большасці галін. Асновай руху наперад на сучасным этапе стануць новыя падыходы да мадэрнізацыі эканомікі. У нашым раёне ў гэтым напрамку ўжо многае зроблена ў мінулай пяцігодцы, у першую чаргу на малочным заводзе і ў Пастаўскім мэблевым цэнтры. Гэтыя два прадпрыемствы з’яўляюцца лакаматывам усёй эканомікі раёна. Малочны завод, рэалізаваўшы праект “Будаўніцтва цэха па вытворчасці сыроў” з інвестыцыямі на суму больш за 200 мільярдаў рублёў, выйшаў у раёне на першае месца па аб’ёмах выпускаемай прадукцыі. Калі да гэтага на заводзе ў суткі перапрацоў¬валася максімум 170 тон малака, то зараз — 300. Уся прадукцыя — высокай якасці, не існуе праблем з яе збытам. У Пастаўскім мэблевым цэнтры да канца гэтага года будзе рэалізаваны інвестпраект “Будаўніцтва вытворчасці па вырабе паркетнай дошкі” магутнасцю адзін мільён квадратных метраў у год. Вытворчыя плошчы ўзведзены, на днях завезена абсталяванне. На новай вытворчасці будзе створана да 100 рабочых месцаў. А ўсяго па раёне, у адпаведнасці з заданнем аблвыканкама, іх павінна прыбавіцца сёлета 160. З заданнем справімся. Нядрэнныя перспектывы развіцця бачацца ў ААТ “Паставымэбля” і на заводзе “Беліт”. У аграрнай галіне мадэрнізаваны фермы ў ААТ “Хацілы-агра” і “Навасёлкі-Лучай”, зараз яны робатызаваныя.

Зараз кітайскія інвестыцыі нашай краіне складаюць адзін мільярд долараў. Пастаўлена задача шукаць магчымасці іх выкарыстання. Для нашага раёна гэта ўзвядзенне дабудовы да цэнтральнай раённай бальніцы, каб мець магчымасць вывесці з былога палаца Тызенгаўзаў усе бальнічныя падраздзяленні і выкарыстоў¬ваць яго цалкам як палацава-паркавы ансамбль, шырока прыцягваць турыстаў. Ёсць на Пастаўшчыне і шмат іншых магчымасцей для развіцця турыстычнага бізнесу, якія пакуль не задзейнічаны. Бу¬дзем больш настойліва працаваць у гэтым напрамку. Ужо ў бліжэйшыя дні ў Азёрках, дзе раней размяшчалася сядзіба Зюзі Паазерскага, адкрыецца “вяровачны гарадок”, які, несумненна, зацікавіць аматараў экстрыму. Прыцягальныя на Пастаўшчыне помнікі архітэктуры, прырода, аграэкасядзібы.

Нязменным на працягу многіх гадоў застаецца для нашай краіны і такі прыярытэт, як экспарт. Па незалежных ад Беларусі прычынах апошнім часам вельмі звузіліся традыцыйныя для нас рынкі збыту. Значыць, трэба шукаць новыя. І ў гэтым напрамку ў нашым раёне прыклад іншым паказвае кіраўніцтва Пастаўскага мэблевага цэнтра, прадукцыя якога пастаўляецца ў 23 краіны свету.

Прэзідэнт абазначыў на Усебеларускім сходзе і неабходнасць развіцця малога бізнесу. У нашым раёне ўлада ніколі не чыніла ніякіх перашкод для прадпрымальніцтва, а наадварот, усяляк падтрымлівала яго. І ўсе бачаць, што бізнес у нас развіваецца паспяхова. На цяперашні час у раёне працуюць 688 індывідуальных прадпрымаль¬нікаў і каля 200 малых камерцыйных прадпрыемстваў.

Асобны раздзел прамовы Кіраўніка краіны прысвячаўся рэгіянальнаму развіццю. Як адзначыў Аляксандр Лукашэнка, вёска, малыя і сярэднія гарады павінны развівацца раўнамерна, а тым, каму аб’ектыўна цяжэй, — аказвацца падтрымка. Тыя прадпрыемствы, якія будуць стварацца ў сельскай мясцовасці, на два гады атрымаюць вызваленне ад падаткаў на прыбытак, дабаўленую вартасць і на ўвозны падатак. Так склаліся абставіны, што ў нашым раёне добрыя вытворчыя магутнасці зараз пустуюць у Варапаеве і Лынтупах. Але ёсць упэўненасць, што з цягам часу яны будуць задзейнічаны. Мы вя¬дзём перагаворы з расійскімі і чэшскімі інвестарамі, якія жадаюць наладзіць у гэтых гарпасёлках сваю вытворчасць.

Пакуль самае вузкае месца ў раёне — гэта сельскагаспадарчая галіна. А задача перад аграпрамысловым комплексам краіны агучана такая — да 2020 года паставіць на экспарт прадукцыі больш чым на 7,5 мільярда долараў пры рэнтабельнасці 10 працэнтаў, даць новы імпульс развіццю фермерства. Аграрыі з надзеяй чакаюць указаў Прэзідэнта, якія дазволяць правесці фінансавае аздараўленне праблемных сельскіх гаспадарак. Але гэта не азначае, што даўгі будуць спісаны.

Многае значаць кадры. Вось і мы ў раёне бачым, што пры аднолькавых умовах вынікі гаспадарання вельмі адрозніваюцца. Калі, напрыклад, ААТ “Хацілы-агра” па вытворчасці сельгаспрадукцыі з’яўляецца флагманам у вобласці, то паказчыкі такіх гаспадарак, як “Вярэнькі-агра”, “Андроны”, “Блакітныя азёры-агра” і іншых, не вытрымліваюць ніякай крытыкі. А рэзервы росту ёсць, і іх трэба выкарыстоўваць.

Не буду спыняцца на многіх іншых пасылах Усебеларускага форуму, якія датычылі культуры, адукацыі, моладзі, сямейных каштоўнасцей і іншых. Упэўнены, што пастаўчане з цікавасцю сачылі за яго работай у сродках масавай інфармацыі і актыўна акбмяркоўвалі вынікі. А завяршу словамі Прэзідэнта: каб лепш жыць, трэба шмат працаваць. У нашым раёне ёсць самае галоўнае — цудоўныя людзі, і ўсе разам мы здолеем справіцца з самымі няпростымі задачамі.

І яшчэ пра адно хачу сказаць сёння, напярэдадні Дня Незалежнасці Рэспублікі Беларусь. Вельмі важна ўсім нам памятаць, якая дарагая цана заплачана падчас Вялікай Айчыннай вайны за вызваленне Беларусі і як важна даражыць усім тым, што здабыта дзесяцігоддзямі, а галоўнае, што над нашай роднай зямлёй мірнае неба.

 

 



1 комментарий по теме “Каб добра жыць, трэба шмат працаваць

  1. Слушныя разважанні! Поспехаў Пастаўшчыне! Адно, каб праца ацэньвалася належным чынам і прыносіла маральнае і матэрыяльнае задавальненне. Каб прысутнічаў сумленны, праўдзівы і крытычны погляд на жыццёвыя рэаліі і ўдавалася знаходзіць шляхі для пераадольвання цяжкасцей і перашкод, без якіх звычайна не абысціся.

    Рейтинг комментария:Vote +10Vote -10

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.