“Пакуль пяём на роднай мове мы…”


Удзельнікі і арганізатары літаратурнага свята.

Стала ўжо традыцыяй пачынаць праграму Міжнароднага фестывалю народнай музыкі “Звіняць цымбалы і гармонік” літаратурнымі святамі. Не адступілі ад яе арганізатары і сёлета, адкрыўшы галоўную падзею культурнага жыцця раёна святам паэзіі “Пакуль пяём на роднай мове мы, жыве зямля бацькоў, жыве Радзіма”, на якое запрасілі прадстаўнікоў беларускага культурна-асветніцкага таварыства “Уздым” з латвійскага горада Даўгаўпілс.

Усіх, хто сабраўся ў канцэртнай зале Пастаўскай дзіцячай школы мастацтваў імя А. Тызенгаўза па вуліцы Чырвонаармейскай, ад імя раённай улады вітала начальнік аддзела ідэалагічнай работы, культуры і па справах моладзі райвыканкама Г. М. Чаплінская. Яна адзначыла, што кожны год свята музыкі і народнай творчасці ператвараецца ў больш ёмістае па сваім змесце мерапрыемства, дзе знаходзіцца месца і паэтычнаму слову, і выяўленчаму, і фотамастацтву.

— Год культуры, аб’яўлены сёлета ў Беларусі, накладвае на нас, арганізатараў, асаблівую адказнасць у плане падрыхтоўкі мерапрыемстваў: трэба, каб яны былі цікавымі і змястоўнымі. Таму невыпадкова на гэта літаратурнае свята мы запрасілі гасцей з Латвіі. Спадзяюся, зможам бліжэй пазнаёміцца з імі і наладзіць больш цесныя сувязі, — выказала надзею Галіна Мікалаеўна.

Таксама яна прэзентавала буклет “Культурная па¬літра Пастаўшчыны”, у якім сабраны матэрыял пра знакамітых людзей нашага краю, пачынаючы ад А. Ромера, У. Дубоўкі і заканчваючы сучаснікамі, калектывы, удастоеныя звання “народны”, уся гісторыя “цымбальнага” свята. Яго спецыяльна да фестывалю стварыў аддзел ідэалагічнай работы, культуры і па справах моладзі.

Тое, што пастаўская зямля ўзгадавала шмат творчых асоб, пацвердзіла вядучая мерапрыемства, бібліятэкар цэнтральнай раённай бібліятэкі В. У. Гірвель. Валянціна Уладзі¬міраўна вельмі цёпла і душэўна гаварыла пра Пастаўшчыну, якая прыгажосцю сваіх краявідаў, багатай гісторыяй, што перадаецца з пакалення ў пакаленне ў легендах і паданнях, мілагучнай беларускай мовай натхняе паэтаў і музыкантаў, мастакоў, кавалёў, ганчароў… — усіх, каму Бог падарыў іскрынку таленту. Паэтычным і празаічным радком праслаўлялі родную старонку Уладзімір Дубоўка, Слава Ліпень, Алесь Касцень, Леанід Трубач, Ніна Захарэвіч, Аркадзь Нафрановіч. Вершы гэтых аўтараў, якіх, на жаль, ужо няма з намі, прадэкламавалі чытачы дзіцячай бібліятэкі імя У. Дубоўкі.

Сёння справу названых літаратараў працягваюць іншыя пісьменнікі-землякі. Адзін з іх — настаўнік геаграфіі і астраноміі Пастаўскай гімназіі, ганаровы член Саюза пісьменнікаў Беларусі, член вучонага савета Беларускага геаграфічнага таварыства і рэдкалегіі часопіса “Геаграфія. Праблемы выкладання”, лаўрэат абласной прэміі імя У. Караткевіча І. М. Пракаповіч, якога запрасілі на сцэну. Ігар Міхайлавіч азнаёміў прысутных са сваімі новымі кнігамі. Так, нядаўна ўбачылі свет папулярны сярод чытачоў зборнік жартоўных рэчаў “Булён” і нататкі пра сустрэчы з цікавымі людзьмі нарачанскага краю “Падарожжа па зямлі мядзельскай”. Ужо гатовы да друку зборнікі кароткіх гумарыстычных вершаў “Геаграфічныя лімэрыкі ад Кірыбыці да Амерыкі” і легенд, паданняў, цікавых гісторый “Залатая выспа”, кніга края¬знаўчага зместу “Стары Двор і ваколіцы”, напісаная сумесна з настаўнікам гісторыі Гуцкай СШ Мікалаем Арэхам. Расказваючы пра вынікі працы на літаратурнай ніве, аўтар прачытаў шэраг сваіх вершаў.

Выдатна валодаюць мастацкім словам таксама Янусь Малец, Наталія Карнілава, Марына Кавалёнак, Воля Лісіцкая, Лідзія Стрылец, іншыя мясцовыя паэты і празаікі. Кожнага з запрошаных вядучая прадставіла публіцы, расказаўшы пра літаратурную дзейнасць, а потым яны самі знаёмілі прысутных з уласнай творчасцю.

У перапынках паміж чытаннем вершаў гледачоў радаваў сваім майстэрствам народны ансамбль беларускай песні “Мала¬дзіца”.

А затым сцэну прадаставілі гасцям — прадстаўнікам таварыства “Уздым”. Яго старшыня Людміла Сінякова расказала, што гэта грамадскае аб’яднанне было створана ў 1993 годзе беларусамі, што жывуць у Латвіі, з мэтай захавання роднай культуры, традыцый і мовы. Яно самае вялікае з 15 суполак, якія працуюць на тэрыторыі краіны, і самае актыўнае: мае ўласны інтэрнэт-сайт, выпускае газету, пры ім дзейнічаюць беларуская ня¬дзельная школа і шмат розных гуртоў. “Уздымаўцамі” ладзяцца літаратурныя вечарыны, сустрэчы, фестывалі, конкурсы, навуковыя канферэнцыі, яны супрацоўнічаюць з беларусамі з Эстоніі, Літвы, Поль¬шчы. Пра сваю дзейнасць расказваюць на старонках мясцовых газет, парталах навін горада, у газеце “Голас Радзімы” і часопісе “ЛіМ”, якія выходзяць у Беларусі. Сябрамі таварыства з’яўляюцца людзі розных прафесій і ўзростаў: настаўнікі, урачы, эканамісты, журналісты, моладзь і пенсіянеры.

У Паставы прыехала дэлегацыя ў складзе 11 чалавек. Сярод іх — заснавальнік таварыства, член Саюза пісьменнікаў Беларусі Станіслаў Валодзька, з творчасцю якога і знаёмілі гледачоў. У праграме гасцей прагучала шмат вершаў аўтара і песень на яго словы і музыку беларускіх кампазітараў.

— Я рады, што некалі выступіў ініцыятарам стварэння беларускай суполкі, — адзначыў С. Валодзька, калі яму далі слова. — У свой час мы мелі шчасце быць на з’ездах беларусаў свету і блізкага замежжа, цяпер прымаем удзел у фестывалях мастацтваў беларусаў свету, якія ўжо двойчы праводзіліся ў Мінску, сёння завіталі да вас на фестываль. Думаю, наперадзе ў нас яшчэ нямала прыемных сустрэч з Бацькаўшчынай.

У канцы свята госці і гаспадары абмяняліся падарункамі. Даўгаўпілчане ўручылі арганізатарам мерапрыемства ў асобе дырэктара Пастаўскай цэнтральнай раённай бібліятэкі Л. Г. Касцень латвійскія сувеніры і выданні культурна-асветніцкага таварыства “Уздым”, у тым ліку кнігу пра дзейнасць аб’яднання, якая ўбачыла свет напярэдадні яго 20-гадовага юбілею. А самі атрымалі ў падарунак прыгожую ляльку, вырабленую пастаўскімі майстрамі. На развітанне ўсе члены латвійскай дэлегацыі экспромтам выканалі “Развітальную песню” на словы С. Валодзькі.

Алена ШАПАВАЛАВА. Фота аўтара.

 

 



1 комментарий по теме ““Пакуль пяём на роднай мове мы…”

  1. Добра, што не забыліся пра літаратурнае свята і грунтоўна расказалі пра яго асобным артыкулам.

    Рейтинг комментария:Vote +10Vote -10

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.