Кампетэнтная і мэтанакіраваная

Личности

Насіць форму, абараняць закон і справядлівасць, прыцягваючы да адказнасці вінаватых, — такое жаданне ў шаркаўчанкі Юліі Ляўшыцкай з’явілася яшчэ ў дзяцінстве. У адрозненне ад сябровак-аднакласніц, якія хацелі быць урачамі, банкірамі, перакладчыкамі, яна марыла працаваць у органах унутраных спраў і ўпарта ішла да сваёй мэты. Пасля школы паступіла на юрыдычны факультэт Віцебскага дзяржаўнага ўніверсітэта імя П. М. Машэрава, на старэйшых курсах якога зразумела: найбольш даспадобы работа следчага. А калі атрымала дыплом, прымяняць набытыя веды на практыцы вырашыла ў Пастаўскім раённым аддзеле Следчага камітэта.

Тут Юлія ўжо чатыры гады і паспела добра зарэкамендаваць сябе. У сваім выбары не расчаравалася, кажа, многае ў рабоце залежыць ад кіраўніцтва і калектыву. А ён дружны, з’яднаны — такі бывае не ўсюды, таму жадання кудысьці перавесціся няма. Калі пачынала працаваць, заўсёды магла разлічваць на дапамогу вопытных калег, якія ніколі і ні ў чым не адмаўлялі. Цяпер жа маладзейшыя супрацоўнікі аддзела часам раяцца з ёй.

Як і іншыя следчыя, Ю. Ляўшыцкая расследуе розныя катэгорыі спраў. Асноўную іх частку складаюць злачынствы супраць уласнасці: крадзяжы і грабяжы. Але нярэдка даводзіцца займацца і цяжкімі цялеснымі пашкоджаннямі.

— Напрыклад, сёлета былі тры такія справы, — расказвала яна. — І ўсе даволі няпростыя. Прыйшлося шмат папрацаваць, перш чым накіраваць іх у суд. За сваю практыку расследавала і забойства, не раз выязджала на суіцыды. Безумоўна, гэта цяжка псіхалагічна, але я ўжо прывыкла, навучылася спраўляцца з эмоцыямі.

Кожны месяц старшы лейтэнант юстыцыі Юлія Ляўшыцкая накіроўвае ў суд 3-4 крымінальныя справы — больш за іншых супрацоўні­каў аддзела, за што рэгулярна прэміруецца ўпраўленнем Следчага камітэта Рэспублікі Беларусь па Віцебскай вобласці. Рабоце яна прысвячае практычна ўвесь свой час, пакуль не мае ўласнай сям’і, часта заседжваецца ў кабінеце да позняга вечара. І пастаянна адчувае цяжар адказнасці, бо разумее: ад яе прафесійных дзеянняў залежаць лёсы людзей.

— Калі не сабраць дастаткова доказаў, не знайсці і не апытаць усіх сведкаў і відавочцаў злачынства, не правесці своечасова неабходныя экспертызы, можна і невінаватага чалавека адправіць за краты, а вінаватага пакінуць на волі, — кажа Юлія.

А таму заўсёды ўважліва вывучае матэрыялы на ўзбуджэнне справы, вельмі акуратна ставіцца да кожнага дакумента і доказу. Нягле­дзячы на малады ўзрост і невялікі працоўны стаж, яна сапраўдны прафесіянал — кампетэнтны і мэтанакіраваны.

Алена ШАПАВАЛАВА.

Фота аўтара.



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.