У атмасферы любові


У нашай школе вучацца 84 дзіцяці з 46 мнагадзетных ­сем’яў. Сёння хачу расказаць пра адну з іх — сям’ю Пятровіч.

Наталля Пятроўна і Аляксандр Фадзеевіч пазнаёміліся на дыскатэцы ў Варапаеве, пакахалі адно другога і праз год, у 1998-ым, стварылі сям’ю. Неўзабаве нарадзіўся першынец — сын Арцём. Потым з’я­віў­ся Дзяніс, а чатыры гады назад — доўгачаканая дачушка Валерыя. Паколькі гаспадар праз паўгода пасля вяселля стаў працаваць дальнабойшчыкам, маладой матулі прыйшлі на дапамогу бабулі Надзея Антонаўна і Галіна Панк­рацьеўна.

Уся сям’я з радасцю чакае чарговага прыезду мужа і таты. Бо агульных захапленняў у Пятровічаў шмат: яны любяць парыбачыць, пагуляць у валейбол, зімой пакатацца на санках з горкі. Нават матулю, Наталлю Пятроўну, летась навучылі катацца на каньках. Любімае свята  — Новы год. Усе рыхтуюць для кожнага падарункі, упрыгожваюць ёлачку. Хоць Аляксандр Фадзеевіч шмат часу знаходзіцца ў дарозе,  стараецца як мага больш  бываць з сям’ёй, штосьці змайстраваць, адрамантаваць, чамусьці навучыць сы­ноў, папесціць дачушку.

Наталля Пятроўна — цудоўная гаспадыня. Яна пячэ вельмі смачныя тарты, гатуе розныя стравы, рупіцца на агародзе, вырошчвае шмат  кветак, захоўвае чысціню і парадак у доме. І абавязкова займаецца выхаваннем дзяцей, аддае ім цеплыню сэрца, сочыць за вучобай, паводзінамі, хвалюецца за кожнага з іх.

Арцём вучыцца ў 9 класе, Дзяніс — у 7-ым, Лера ходзіць у дзіцячы садок “Спадарожнік”. У кожнага ёсць свае інтарэсы і захапленні. Напрыклад, Арцёму падабаецца спорт, Дзяніс любіць гатаваць піцу,  кексы. Хлопчыкі добра малююць, наведваюць мастацкую школу. Арцёму больш падабаюцца ўрокі фізкультуры, ін­фар­матыкі, чарчэння, фізікі, Дзянісу — англійскай мовы, літаратуры, фізкультуры. Валерыя наведвае танцавальны і гурток англійскай мовы ў дзіцячым садку.

Каб матулі было лягчэй,  сыны ва ўсім дапамагаюць ёй: гуляюць з сястрычкай, прыбіраюць у хаце, цепляць лазню, працуюць у агародзе. А яшчэ любяць дарыць матулі кветкі, і не толькі ў свята. Галоўнае для іх, каб на яе твары ззяла радасная ўсме­шка.

У сям’і Пятровіч пануе атмасфера даверу,  узаемапавагі, сяброўства. Яны з радасцю прымаюць гасцей. І дзеці, і бацькі не забываюць бабуль і дзядулю, якія жывуць у Савічах і Варапаеве, наведваюць іх, дапамагаюць у розных хатніх справах, віншуюць са святамі.

Вось ужо 18 гадоў крочаць па жыцці разам Наталля Пятроўна і Аляксандр Фадзеевіч, падтрымліваючы адно аднаго і выхоўваючы сваіх дзяцей. Хочацца пажадаць ім здароўя, радасці, шчасця і каб яны ганарыліся кожным сваім дзіцяткам.

Г. СІНІЦА,

настаўніца СШ №2.



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.