Конкурс каляднай песні

Духовность

Удзельнікаў конкурсу вітае намеснік старшыні райвыканкама Ю. М. Кісялёў.
Удзельнікаў конкурсу вітае намеснік старшыні райвыканкама Ю. М. Кісялёў.

На свята Божага Нара­джэння дрэвы і кусты не маюць ні лісцікаў, ні кветак, але іх аздабляе само Неба: пасылае зіхоткія сняжынкі, каб павялічыць радасць. У гэты час не спяваюць птушкі, але свята ўпрыгожваюць спевы калядных песень. Менавіта іх конкурс адбыўся ў Паставах сярод  дзяцей і моладзі парафіі Святога Антонія Падуанскага і парафіі Езуса Міласэрнага.

Ён праводзіўся ў дзвюх узроставых груgах: да дзесяці гадоў і ад дзесяці да сямнаццаці. У малодшай групе самай маленькай выканаўцай была Малько Жэня (4 гады) з песняй “Ідзе на зямлю”. Чатырохгадовая Жук Крысціна разам са сваімі сёстрамі  Маргарытай (6 гадоў) і Насцяй (8 гадоў) праспявала песню “Кароўкі, авечкі”. Добра падрыхтаваліся і выступілі ў малодшай узроставай групе таксама Дзіковіч Аліна, Дзіковіч Яна, Касарэўская Вераніка, Палякова Ульяна. Трэцяе месца ў гэтай групе заняла і атрымала прыз (рукзак) Шаура Маша, другое і прыз (палатку) — Маргуноў Арцём, першае  і прыз (гітару) — Бабчук Маша.

Маша Бабчук.
Маша Бабчук.

У старэйшай узроставай групе, акрамя песень, прагучала на флейце “Аve Maria” ў выкананні Касарэўскага Аляксея. Песню “Зорка Бэтлеемска” выканаў Цалко Мацвей, яму на балалайцы акампаніраваў старэйшы брат  Станіслаў. На польскай мове прагучала песня  “Марозная ціша” ў выкананні Нікіфаровіч Маргарыты. Таксама Маргарыта разам з Буцневіч Таццянай праспявала песню “Вітай, зорка ранняя”. Гучнымі апладысментамі дзякавалі слухачы Буйко Алесі, Буйко Сняжане, Казлоўскай Ангеліне, Фярковіч Насці, Скрыпко Ларысе. Першае месца ў гэтай узроставай групе і гітару атрымала Ожаль Юлія (дарэчы, яна ўсе чатыры разы прымала ўдзел у конкурсе каляднай песні), другое месца і прыз (палатка) — у Сідлярэвіч Кацярыны, трэцяе і прыз (рукзак) — у Таразевіч Кацярыны. Усе ўдзельнікі атрымалі салодкія падарункі і сшыткі.

Юля Ожаль з ксяндзамі Андрэем і  Вадзімам.
Юля Ожаль з ксяндзамі Андрэем і Вадзімам.

Падводзячы вынікі конкурсу, намеснік старшыні райвыканкама Кісялёў Юрый Мікалаевіч падзякаваў дзецям за тыя радасць, цяпло і спакой, якія яны перадавалі сваімі спевамі гледачам, пажадаў далейшых творчых поспехаў. 

Конкурс не адбыўся б, калі б  у дзяцей не было цудоўных  настаўнікаў: Касарэўскай Вольгі Уладзіміраўны, Кватарчук Вольгі Віктараўны, Сівіцкай Ядвігі Фабіянаўны. Ім, як і выканаўцам, зала доўга апладзіравала. 

У той жа дзень прайшоў і конкурс “Шопка”. Сем’і (дарослыя разам з дзецьмі) павінны былі змайстраваць, у адпаведнасці са сваёй фантазіяй, месца, дзе нарадзіўся Езус. Першае месца ў ім заняла сям’я Андрэя і Маі Дулінец,  другое — сям’я Яўгена і Алены Хмяльніцкіх.

Пра прызы для пераможцаў і падарункі для ўсіх удзельнікаў конкурсу паклапаціліся пробашчы парафій Святога Антонія Падуанскага і Езуса Міласэрнага — ксяндзы Вадзім Прасяной і Андрэй Бульчак.

    Аліна ЛАТЫШ,

няштатны карэспандэнт.

Фота Пятра КУРЫЛОВІЧА.



Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.