Будзем знаёмыя!


IMG_3188

Шаноўныя чытачы, будзем знаёмыя! Зрэшты, мы з вамі і так ужо знаёмыя. Апошнія пяць месяцаў, якія працую ў газеце “Пастаўскі край”, артыкулы за маім подпісам рэгулярна з’яўляліся на яе старонках. Таксама вы маглі мяне ведаць і намнога раней, калі вы — прыхільнікі мясцовага тэлебачання “Паставы-ТБ”, дзе я працавала практычна з пачатку яго стварэння.

Сёлетні год можна лічыць рэвалюцыйным у плане абнаўлення кадраў у раёне. З нумара ў нумар мы паведамляем чытачам звесткі пра новых кіраўнікоў прадпрыемстваў і арганізацый Пастаўшчыны, якія прыходзяць на змену сваім папярэднікам. Яшчэ зусім нядаўна я і падумаць не магла, што такую калонку прыйдзецца пісаць пра сябе. Дазвольце прадставіцца — галоўны рэдактар газеты “Пастаўскі край” Людміла Зелянкевіч.

Пішу гэтыя словы з трапятаннем. Узначальваць рэдакцыйны калектыў — вялікая адказнасць. Асабліва складана падтрымліваць тую высокую прафесійную планку, на якую ўзняла пастаўскую раёнку мая папярэдніца Фаіна Альфонсаўна Касаткіна. Яна 18 гадоў была на пасадзе галоўнага рэдактара. Сёлета прыняла рашэнне пакінуць яе. Але, да вялікай радасці калектыву і чытачоў, застаецца ў штаце рэдакцыі. Так што яшчэ неаднойчы яе пранікнёныя артыкулы закрануць вашы сэрцы.

Увогуле калектыў “Пастаўскага краю” ўяўляе сабой сплаў вопыту і маладосці. Мяркую, што гэты сінтэз пой­дзе на карысць выданню. Таксама як і ваш актыўны ўдзел у яго стварэнні. Дасылайце, як і раней, свае лісты ў рэдакцыю, тэлефануйце нам, пакідайце каментарыі на сайце і ў сацыяльных сетках, падказвайце цікавыя тэмы і рубрыкі, якія вам хацелася б бачыць на старонках газеты. А мы са свайго боку абяцаем шукаць новыя сучасныя формы падачы інфармацыі і традыцыйна гарантуем  толькі дакладныя і правераныя факты. Так што заставайцеся з намі!

Коратка пра сябе

Нарадзілася 15 снежня 1981 года ў Паставах. У 2005-м закончыла факультэт беларускай філалогіі і культуры Віцебскага дзяржаўнага ўніверсітэта па спецыяльнасці “Філолаг. Літаратурны работнік у газетах і журналах”. Па размеркаванні два гады працавала карэспандэнтам у газеце “Міёрскія навіны”. У 2008 годзе прыйшла карэспандэнтам у рэдакцыю праграмы тэлебачання “Паставы-ТБ”. З 2012-га ўзначальвала гэты калектыў. Потым быў дэкрэтны водпуск. З 17 сакавіка бягучага года — загадчык аграпрамысловага аддзела рэдакцыі газеты “Пастаўскі край”. 18 жніўня распараджэннем старшыні райвыканкама па ўзгадненні з Віцебскім абласным выканаўчым камітэтам назначана галоўным рэдактарам.        



3 комментария по теме “Будзем знаёмыя!

  1. І вам вялікае дзякуй за ўвагу да газеты і цёплыя словы. Такое стаўленне да журналісцкай працы натхняе. Будзем старацца. А вам жадаем здароўя і заўсёднай творчасці.

    Рейтинг комментария:Vote +10Vote -10

  2. Дзякуй Фаіне Альфонсаўне за сумленную, мужную працу і прафесіяналізм! Далейшых поспехаў і здароўя!
    Шчырыя віншаванні новаму галоўнаму рэдактару! Такой жа апантанасці,працалюбства, цёплых і справядлівых адносін з чытачамі раёнкі, як гэта было ў таленавітай папярэдніцы. Няхай у рэдакцыі пануюць згода, узаемадапамога і чалавечнасць. Цікавых матэрыялаў і здзяйсненняў. Каб старонках газеты знаходзілася месца для працягу культурных і літаратурных традыцый. З павагай, ваш пастаянны чытач і зямляк Янусь Малец.

    Рейтинг комментария:Vote +10Vote -10

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.