Не раздзялілі граніцы і палітыка


IMG_3862

26 верасня члены савета і актывісты раённай арганізацыі грамадскага аб’яднання “Беларускі саюз ветэранаў вайны ў Афганістане” прымалі ў сябе “афганцаў” з літоўскага горада Вісагінас — кіраўніка клуба “Саланг” Сігітаса Дудкявічуса і яго сябра і паплечніка Сяргея Варапаева.

Клуб ветэранаў вайны ў Афганістане “Саланг” (названы так у гонар знакамітага перавалу ў гэтай паўднёвай краіне) існуе ў Віса­гінасе ўжо 15 гадоў і аб’ядноўвае ў сваіх радах 21 чалавека. Яны штогод прымаюць удзел у міжнародным злёце воінаў-інтэрнацыяналістаў, на які збіраюцца прадстаўнікі трох прыбалтыйскіх рэспублік, а заснавальнік і кіраўнік клуба С. Дудкявічус з’яўляецца яшчэ і актывістам міжнароднай арганізацыі “Баявое братэрства”. Менавіта яму прыйшла ў галаву ідэя расшырыць сяброўскія сувязі ветэранаў-прыбалтыйцаў і запрасіць на сустрэчу “афганцаў” з прыгранічных раёнаў Беларусі — Пастаўскага і Браслаўскага, а таксама расіян з Калінінградскай вобласці.

— Зразумела, мы не маглі не прыняць гэтага запрашэння, тым больш што сёлета злёт праходзіў у горадзе-пабраціме Пастаў — Рокішкіс, і ў пачатку жніўня адправіліся ў Літву, — расказваў старшыня раённай арганізацыі ГА “Беларускі саюз ветэранаў вайны ў Афганістане” Валерый Лушчык. — Пагля­дзелі, як там усё адбываецца. А вярнуўшыся дамоў, пачалі абмяркоўваць парадак нашых далейшых дзеянняў у плане сумеснай работы воінаў-інтэрнацыяналістаў прыгранічча, знайшоўшы падтрымку ў намесніка старшыні райвыканкама Юрыя Мікалаевіча Кісялёва. І вось новая сустрэча, цяпер ужо на пастаўскай зямлі.

Спачатку літоўскіх гасцей запрасілі ў раённы выканаўчы камітэт, дзе адбылося знаёмства з прадстаўні­камі мясцовай адміністрацыі і былі яшчэ раз агавораны магчымасці супрацоўніцтва. Каб замежныя сябры атрымалі ўяўленне пра наш раён, яго гісторыю і культуру, кожнаму падарылі кнігу “Памяць”. Са свайго боку літоўцы прывезлі ў падарунак цікавы фотаальбом, створаны членамі рокішскай арганізацыі ветэранаў. Адзін яго экзэмпляр уручылі В. А. Лушчыку, другі — кіраўніку музея баявой і працоўнай славы СШ №2 г. Паставы Р. Н. Ластоўскай. Але перш чым адправіцца ў музей, госці ў суправаджэнні гаспадароў наведалі Алею славы па вуліцы Гагарына ў райцэнтры і ўсклалі кветкі да помніка загінулым у Афганістане і Сірыі пастаўчанам. Паглядзелі таксама выстаўленую тут жа баявую тэхніку, якая выкарыстоў­валася ў тым ліку падчас афганскай вайны.

IMG_3877

Экскурсія ў школьным музеі, якую правяла Рэгіна Норбертаўна, пачалася з гісторыі Пастаў. А найбольшая ўвага была ўдзелена  экспазіцыі, прысвечанай воінам-інтэрнацыяналістам. Гэты раздзел адкрылі ў 1990 годзе, неўзабаве пасля вываду савецкіх войскаў з Афганістана. Тут сабраны багаты матэрыял пра нашых землякоў, якія вярнуліся з вайны жывымі і “грузам-200”: іх асабістыя рэчы, фотаздымкі, дакументы і іншае. Затым усе накіраваліся ў музей у падвальных памяшканнях палаца Тызенгаўзаў, дзе навуковы супрацоўнік Вадзім Шышко расказаў пра былых гаспадароў Пастаў — Антонія і Канстанціна Тызенгаўзаў, дзейнасць лет­ніх лагераў Санкт-Пецярбургскай афіцэрскай кавалерыйскай школы, што размяшчаліся ў былым паляўнічым замку графа Пшэздзецкага, і паказаў невялікі дакументальны фільм пра лагер, зняты ў 1908 годзе. Больш падрабязна спыніўся на падзеях Першай сусветнай вайны на Пастаўшчыне, якая пакінула ў нас больш слядоў, чым Вялікая Айчынная.

Завяршала праграму знаходжання літоўцаў на Пастаўшчыне наведванне спартыўна-турыстычнага комплексу “Азёркі”. Там яны пазнаёміліся з інфраструктурай аб’екта, што неў­забаве можа стаць месцам правядзення сумеснага мерапрыемства “афганцаў”, якіх не раздзялілі ні Дзяржаўныя граніцы, ні палітыка ўлад.

Алена ШАПАВАЛАВА.

Фота аўтара.



Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.