Дзякуй за чуласць і пазітыў

Общество

Калі «Пастаўскі край» яшчэ толькі распрацоўваў канцэпцыю конкурсу «Мой любімы гадаванец», супрацоўнікі рэдакцыі доўга абмяркоўвалі, па якіх крытэрыях ацэньваць фотаздымкі і допісы пра вашых любімцаў, як зрабіць гэта найбольш аб’ектыўна, які падарунак прапанаваць пераможцу. А больш за ўсё хваляваліся, ці знойдзе наша задума водгук у вашых сэрцах. Таму вельмі ўзрадава­ліся, калі чытачы сталі дасылаць у раёнку лісты і фотаздымкі сваіх пацешных гадаванцаў.

Усяго на конкурс паступіла 18 работ. І кожная з іх — мініяцюрны твор мастацтва, прасякнуты любоўю да братоў нашых меншых. Ведалі б вы, з якой цікавасцю мы разглядвалі фотаздымак кожнага героя, чыталі аповед пра яго, з якім замілаваннем і азартам абмяркоўвалі! Знаёмячыся з вашымі допісамі, калектыў рэдакцыі атрымаў неверагодны зарад пазітыву, узрадаваўся неабыякавасці і цеплыні вашых сэрцаў.

Дружалюбны сібірскі хаскі Міра Аматэрасу, вясёлая кампанія, у якую ўваходзяць забіяцкі сабачка Сандра і каты-прыгажуны Ягор і Ёся, котачка Блыхастая з паляўнічымі задаткамі, ласун памеранскі шпіц Філіпок і яго гуллівая суседка па месцы жыхарства Злата, аднолькавай масці адданыя гаспадарам каты Валерык і Руся, «энергаджайзер» аўчарка Торы і яе назіральная суседка Чуча, пазі­тыўная і ласкавая такса Рэм, з характарам англійская аблавухая кошачка Ліза, падарожнік Жорж, дапытлівы Персік, ласкавая такса Фунцік, пільны вартаўнік Бімка, спартыўны кот Цімка, інтэлектуальная кошачка Мілі, абаяльны кампаньён Дамінік, жыццярадасны паляўнічы Шрэк, экзатычныя актывісткі і акуратысткі чылійскія вавёркі Пірат і Маха. Нехта з іх аблашчаны лёсам з нара­джэння і мае ўласны пашпарт, які пацвярджае чыстакроўнасць пароды, а нехта атрымаў права на шчаслівы лёс дзякуючы вашай чуласці. І ўсе — любімыя і непаўторныя. Нам жа спадабаліся ўсе!

Што да пераможцаў конкурсу, то большасцю галасоў імі выбраны кошачкі Белачка і Тоська — гадаванцы пастаўчанкі Леакадзіі Гінько (на здымку).Разам з віншаваннямі ад рэдакцыйнага калектыву яна атрымала маляўніча аформлены падарункавы сертыфікат на падпіску на «Пастаўскі край» на другое паўгоддзе.

Вераніка ФІЛАНОВІЧ
Фота аўтара



Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.