В гости к ветерану. Воропаевский сельсовет единственный в районе, где еще живут ветераны ВОВ

75 лет Победы Общество

Подзвіг народа несмяротны

Час імкліва бяжыць наперад, аддаляючы нас ад трагічных падзей Вялікай Айчыннай вайны. Але ён не ўладны над подзвігам нашых продкаў, якія ў кровапралітных баях адстаялі права людзей быць свабоднымі, усталявалі мір на зямлі. Памяць пра іх гераічную самаахвярнасць жыве ў сэрцах нашчадкаў, як і ўдзячнасць за яе — і мёртвым, і жывым вызваліцелям.

26 чэрвеня ахінуць клопатам і ўвагай нешматлікіх жывых сведкаў тых трагічных падзей адправіліся камісар райваенкамата Мікалай Кулік і старшыня раённага савета ветэранаў Ганна Літвіновіч. Пункт прызначэння — Варапаеўскі сельсавет. Тут да іх далучыліся старшыня сельскага Савета Іна Касарэўская і некаторыя прадстаўнікі арганізацый, у якіх перад выхадам на пенсію працавалі ветэраны.

— Наш сельсавет адзіны ў раёне, дзе яшчэ жывуць ветэраны. Іх засталося ўсяго чацвёра: работнік прыфрантавых дарог Віктар Мацвеевіч Красоўскі, удзельнік вайны Іван Паўлавіч Бараноўскі, партызанка Ніна Пятроўна Андрэйчык і інвалід дзяцінства па наступствах вайны Часлаў Данілавіч Муха, — расказвала Іна Касарэўская. — Літаральна некалькі месяцаў не дажылі да святкавання 75-й гадавіны з дня вызвалення Беларусі ад нямецка-фашысцкіх захопнікаў ветэраны Мікалай Ільіч Лысоў, Ігнацій Міхайлавіч Мычко і Уладзімір Ігнацьевіч Заяц. Узгадваю, як яны радаваліся любой увазе, дзяліліся ўспамінамі пра вайну, зараджалі аптымізмам.

Словы падзякі, пажаданні доўгіх гадоў жыцця, здароўя, аптымізму і бадзёрасці гучалі ў кожнай хаце, дзе жывуць ветэраны. Таксама ім былі ўручаны віншавальныя лісты-трохвугольнікі за подпісам Прэзідэнта краіны Аляксандра Лукашэнкі, святочныя паштоўкі, падпісаныя старшынёй райвыканкама Сяргеем Чэпікам, падарункі ад Беларускага грамадскага аб’яднання ветэранаў, раённай арганізацыі ГА «Белая Русь», Варапаеўскай дыстанцыі пуці, рай­спажыўтаварыства. Прыбавілася ўзнагарод на парадных кіцелях пераможцаў: Мікалай Кулік уручыў кожнаму ветэрану юбілейны медаль «75 год вызвалення Беларусі ад нямецка-фашысцкіх захопнікаў».

У райцэнтры да «віншавальнага эскорта» далучыліся кіраўнік раёна Сяргей Чэпік і прадстаўніца Беларускага рэспубліканскага саюза моладзі Святлана Грэська.

— Сардэчна віншую з Днём Незалежнасці краіны і 75-годдзем вызвалення Беларусі! — гаварыў Пятру Мікалаевічу Бобрыку старшыня райвыканкама. — Жадаю моцнага здароўя, дабрабыту, доўгіх-доўгіх гадоў жыцця. Дзякуй за ўсё, што вы ў ваенныя і мірныя гады зрабілі для нашай Радзімы.

Шчырыя словы гучалі ў той дзень таксама для ветэранаў Іларыёна Савельевіча Русалоўскага і Баляслава Антонавіча Квача, зноў і зноў паўтаралася, што мы ў неаплатным даўгу перад тымі, чые мужнасць і франтавое братэрства сталі ўзорам служэння ідэалам міру і дабра. І ў адказ нязменна чулася: «Дзякуй, што не забываеце». Не маем права. Нават надпіс па акружнасці юбілейнага медаля выказвае стаўленне беларусаў да Вялікай Перамогі і тых, хто яе набліжаў, — «Подзвіг народа несмяротны».

Тэкст і фота Веранікі Філановіч



Tagged

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.