Соцработники, БРСМ и БОКК доставляют пожилым людям лекарства или продукты на дом

Общество

З дастаўкай дадому

Сёлета камітэт па працы, занятасці і сацыяльнай абароне Віцебскага аблвыканкама, Беларускае таварыства Чырвонага Крыжа і Беларускі рэспубліканскі саюз мола­дзі заключылі пагадненне аб шматбаковым супрацоўніцтве. Запланавана правя­дзенне шэрага сумесных акцый і мерапрыемстваў, накіраваных на падтрымку найбольш уразлівых катэгорый насельніцтва і прапаганду здаровага ладу жыцця.

Ва ўмовах складанай эпідэ­міялагічнай абстаноўкі асабліва вялікая ўвага ўдзяляецца пажылым грамадзянам, якім супрацьпаказана наведванне месцаў масавага збору лю­дзей. Не ва ўсіх іх ёсць родныя і блізкія, якія сходзяць замест іх у магазін, аптэку ці па рэцэпт у паліклініку. На Пастаўшчыне ў такой сітуацыі гатовыя дапамагчы работнікі Пастаўскага тэрытарыяльнага цэнтра сацыяльнага абслугоўвання насельніцтва і іх новыя памочнікі — 11 валанцёраў райкама БРСМ і раённай арганізацыі БТЧК.

За дастаўкай прадуктаў Люцыі Камянецкай валанцёры і сацработнік

— Тэлефонныя заяўкі на дастаўку лекаў ці прадуктаў пажылыя людзі пакідаюць у ТЦСАН, — расказала старшыня раённай арганізацыі Беларускага таварыства Чырвонага Крыжа Таццяна Шахава. — Кантакты тых, хто просіць дапамогі, часткова перадаюцца і валанцёрам. За два апошнія тыдні яны наведалі ў Паставах 9 пажылых грамадзян (усяго па горадзе паступіла 28 заявак — аўт.). Чацвёра звярнуліся з просьбай забраць у паліклініцы рэцэпт на атрыманне лекаў, пяцёра папрасілі даставіць ім дадому прадукты.

Сярод тых, хто патэлефанаваў у ТЦСАН на мінулым тыдні, была 82-гадовая адзінокая жыхарка райцэнтра Люцыя Камянецкая. Супрацоўніца сацыяльнай службы Ірына Куцуха і валанцёры прывезлі ёй хлеб, мясныя вырабы, запалкі, фрукты — усё, што прасіла напярэдадні жанчына. Разлічыўшыся за пакупкі, Люцыя Сігізмундаўна шчыра падзякавала гасцям за аказаную ёй дапамогу.

Нагадаем, што пакінуць заяўкі ў ТЦСАН пажылыя людзі і інваліды могуць па тэлефонах: 2-40-64, 2-06-50 (у рабочыя дні), 2-40-64 (у выхадныя і святочныя). Час прыёму заявак — з 9.00 да 18.00.

Іна Сняжкова. Фота аўтара



Tagged

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.