Капсула с землей, собранной с мест захоронений солдат и жертв ВОВ, передана в Минск

75 лет Победы

21 пахаванне ў капсуле

Амаль год у Беларусі праходзіць маштабная акцыя «На славу агульнай Перамогі!». У яе рамках з усіх воінскіх пахаванняў і пахаванняў ахвяр вайны на тэрыторыі нашага раёна ажыццёўлены забор зямлі, якая, як і зямля з іншых пахаванняў рэспублікі, 9 Мая будзе змешчана ў крыпце храма-помніка ў гонар Усіх Святых у Мінску.

Усяго на Пастаўшчыне 21 пахаванне перыяду Вялікай Айчыннай вайны. 9 з іх з’яўляюцца воінскімі, у 12 пакояцца ахвяры вайны. Разам з прадстаўнікамі райваенкамата, раённай улады, БРСМ і іншых грамадскіх арганізацый на кожным з іх пабывалі супрацоўнікі раённага краязнаўчага музея і зрабілі забор зямлі. Да нядаўняга часу яна захоўвалася ў музеі ў палатняных мяшочках, а 30 красавіка была перасыпана ў агульную капсулу, якую на днях даставілі ў сталіцу.

Аксана Журава перасыпае ў капсулу зямлю, узятую з воінскіх пахаванняў і пахаванняў ахвяр вайны

Урачыстае мерапрыемства па напаўненні капсулы было немнагалюдным. На ім прысутнічалі старшыня раённага Савета дэпутатаў Пётр Курто, намеснік старшыні райвыканкама Юрый Кісялёў, начальнік аддзела ідэалагічнай работы, культуры і па справах моладзі Галіна Чаплінская са сваім намеснікам Ірынай Лойкай, раённы ваенны камісар Мікалай Кулік, дырэктар СШ №2 Аляксандр Кузняцоў і работнікі музея. Спачатку дырэктар установы культуры Таццяна Гарошка расказала, як праходзіла акцыя на Пастаўшчыне. Затым слова ўзяў Юрый Кісялёў.

— Родная зямля сама па сабе для нас святая. А калі ідзе размова пра зямлю, палітую крывёй воінаў-вызваліцеляў, то яна святая ўдвая, — гаварыў Юрый Мікалаевіч. — Сённяшняя акцыя — гэта злучальная нітка паміж мінулым, сучасным і будучым, сімвал памяці пра людзей, якія паклалі на алтар Перамогі самае дарагое, што ў іх было, — свае жыцці. Таксама гэта сімвал памяці пра тых, хто вынес на сваіх плячах неймаверны цяжар ба­рацьбы з ворагам, пра мірных жыхароў, якія аказаліся ў самым пекле вайны. Капсула з зямлёй будзе нагадваць, якой цаной заваявана мірнае неба над галавой.

Права перасыпаць зямлю ў капсулу далі навуковаму супрацоўніку музея Аксане Журавай, якая прымала ўдзел у некалькіх экспедыцыях. Ёй дапамагалі Пётр Курто і Мікалай Кулік. На гэтым мерапрыемства завяршылася. Але не завершана работа па ўстанаўленні імёнаў салдат, якія ўжо 75 гадоў лічацца невядомымі. Адным з тых, хто актыўна займаецца такой работай у нашым раёне, з’яўляецца Аляксандр Кузняцоў.

— Мне давялося папрацаваць над спісамі раней невядомых воінаў, якія загінулі пры вызваленні Пастаўшчыны, і ўстанавіць шэраг прозвішчаў, — гаварыў Аляксандр Іванавіч. — Думаю, прый­дзе час, калі мы назавём усіх пайменна. І гэта будзе самай вялікай узнагародай вызваліцелям за тое, што яны зрабілі для нас, прадстаўнікоў цяперашняга пакалення.

Алена Шапавалава. Фота аўтара



Tagged

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.