Полсотни километров дорог Браславского района обслуживают поставчане — филиал «ДЭУ-33» РУП «Витебскавтодор»

Общество

Пастаўчане шчыруюць на Браслаўшчыне

2 ліпеня пункт пропуску «Відзы» на беларуска-літоўскай граніцы зменіць статус са спрошчанага на міжнародны. Гэта патрабуе пэўнага ўдасканалення транспартнай інфраструктуры.

Паўсотні кіламетраў дарог Браслаўскага раёна абслугоўваюць пастаўчане — філіял «ДЭУ-33» РУП «Віцебск­аўтадар». Менавіта яго работнікі цяпер выконваюць рамонтныя работы як на пад’ездзе да пункта пропуску «Відзы», так і ў самім гарадскім пасёлку.

Дарожныя рабочыя Алег Карчажка, Барыс Павядайка, Яўген Дзядоў

— Наша прадпрыемства абслугоўвае 212 кіламетраў дарог рэспубліканскага значэння, 42 км з іх праходзяць па Браслаўскім раёне, — з такіх фактаў пачаў размову начальнік ДЭУ-33 Алег Крукоўскі, з якім сустрэлася перад ад’ездам на браслаўскі аб’ект пастаўскіх дарожнікаў. — Капітальнага рамонту там патрабуюць 840 метраў дарогі, бягучага — 9 км. Наогул у плане добраўпарадкавання да Відзаў сёлета павышаная ўвага. Распараджэннем Віцебскага аблвыканкама ў 2020 годзе гэты гарадскі пасёлак разам з Обаллю Шумілінскага раёна вызначаны населеным пунктам, у якіх праводзіцца грунтоўнае добраўпарадкаванне. У лепшы бок мяняюцца аб’екты сацыяльнай сферы, грамадскія месцы, а таксама дарогі. З пачатку мая мы там ужо зрабілі многае: нанеслі ахоўны слой пакрыцця, паднавілі тратуары і пешаходныя дарожкі, замянілі знакі. Да канца месяца работы ў самім гарадскім пасёлку будуць завершаны.

Наколькі лепшым стала дарожнае пакрыццё ў Відзах, змагла пераканацца і сама, калі накіроўвалася на беларуска-літоўскую граніцу.

Перад пунктам пропуску работа ў дарожнікаў кіпела ў прамым сэнсе слова: у дзень майго прыезду яны завяршалі ўкладваць асфальт. Для гэтага была задзейнічана будаўнічая тэхніка ДЭУ-33 і асфальтаўкладачная — філіяла «Пастаўскае ДРБУ-132».

— Пасля капітальнага рамонту на ўчастку дарогі даўжынёй каля 320 метраў з’явіцца дадатковая паласа для прыпынку велікагрузных транспартных сродкаў, — адзначыў галоўны інжынер ДЭУ-33 Мікалай Цехановіч. — Яны пойдуць праз граніцу, калі пункт пропуску зменіць свой статус.

Калі брыгада скончыць укладваць асфальт, возьмецца за аддзелачныя работы — трэба будзе адсыпаць абочыны, умацаваць адкосы, нанесці разметку, устанавіць дарожныя знакі. Здача аб’екта адбудзецца напрыканцы чэрвеня.

Іна Сняжкова. Фота аўтара



Tagged

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.