В ОАО «Хотилы-агро» на жатве в один день тысячниками стали 6 человек. Трое — из одной семьи

Сельское хозяйство

Тры тысячнікі з адной сям’і

У ААТ «Хацілы-агра» на жніве ў адзін дзень тысячнікамі сталі шэсць чалавек. Сярод іх камбайнер Андрэй Волк і два яго сыны— Мікалай і Ілья, якія адвозяць збожжа з поля на зернесушыльны комплекс.

Таццяна Волк вярнулася з фермы, дзе працуе аператарам па даглядзе цялят, управілася па гаспадарцы, прыгатавала вячэру і чакала мужа і сыноў са жніва. Першай іх убачыла 12-гадовая Ульянка.

— Мама, хадзі хутчэй да акна! — паклікала дачка. — Паглядзі, у якіх прыгожых футболках ідуць Коля і Ілья. Дзе яны іх у полі купілі? А які задаволены твар у таты!

Мужчыны пераступілі парог дома, і дзяўчынка падбегла да іх з пытаннямі.

— Пачакай, нецярплівая гарэза, — прытуліў да сябе дачушку Андрэй. — Сядзем вячэраць — тады і пагаворым.

А расказаць у той вечар сапраўды было пра што. Першым тысячу тон зерня намалаціў Мікалай Чашун, за ім — Андрэй Волк. Абодва сёлета атрымалі новыя камбайны. І тэхніка не падвяла. Дабавілі свайго старання — атрымалі цудоўны вынік. У кагорту тысячнікаў прыпісаўся і малады Аляксей Власаў. Сярод ва­дзіцеляў першынстваваў Аляксандр Валодзічаў, затым па тысячы набралі Мікалай і Ілья. З віншаваннямі да іх прама ў поле прыехалі з упраўлення па сельскай гаспадарцы і харчаванні райвыканкама. Пераможцы атрымалі дыпломы, прэміі. Першы сакратар райкама БРСМ Вераніка Казлоўская ўручыла футболкі, кепкі, каштоўныя падарункі.

На жніве ў той дзень Андрэй Волк быў з малодшым сынам Ільёй. Коля на бацькавым прэс-падборшчыку рулоніў сена. Да яго першы сакратар райкама БРСМ прыехала ў поле каля Заброддзя.

Сабраўшыся дома за вячэрай, мужчыны дзяліліся ўражаннямі, успаміналі, хто прыяз­джаў, чаго ім пажадаў. Маці з дачкой з гордасцю глядзелі на сваіх герояў і ўважліва слухалі. Таццяна трывожылася за малодшага: Іллі на днях споўніцца 18 гадоў, восенню прызавуць у армію. Старэйшы Коля ўжо пяць гадоў як адслужыў у пагранічных войсках у Брэсце, вярнуўся дадому. Так спакойна, калі ўся сям’я ў зборы. Але ж армію называюць школай жыцця, і яе павінен прайсці кожны мужчына.

Мікалай і Ілья пачыналі сваю працоўную дзей­насць, ідучы практычна адной і той жа жыццёвай дарогай. Цягу да тэхнікі, зямлі і нялёгкай сялянскай працы перанялі ад бацькі. Спачатку старэйшы, а затым малодшы былі ў яго памочнікамі на камбайне. Цяпер працуюць самастойна. Трымаюць хлебаробскую марку і гонар прозвішча.

Анна Анішкевіч. Фота аўтара



Читайте также:
Павел Кевлич из ОАО «Камайский-агро» первый среди молодых водителей перевез 1000 тонн урожая
Словом и делом. В ОАО «Новоселки-Лучай» для комбайнеров устроили праздник в поле
Средняя урожайность в ОАО «Хотилы-агро» — 67 центнеров с гектара



Tagged

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.