Работники ОАО «Поставымебель» собирают детскую мебель в новом детском саду в 6 городке

З выездам на месца

У пачатку наступнага года сцены дзіцячага садка ў 6-м гарадку райцэнтра напоўняцца гоманам малечы. Зараз унутры памяшкання апошнія работы завяршаюць будаўнікі «Рассвета Пастаўскага». Побач з імі шчыруюць работнікі «Паставымэблі» — яны збіраюць на аб’екце дзіцячую мэблю.

Многія пастаўчане адзначаюць, што дашкольная ўстанова нагадвае казачны замак. Яна не толькі неверагодна прыгожая звонку, але і светлая ўнутры, з пафарбаванымі ў розныя колеры сценамі. Яркую афарбоўку мае і дзіцячая мэбля. Асноўным яе пастаўшчыком з’яўляецца ААТ «Паставымэбля».

— Абавязковай умовай тэндара, які мы выйгралі, з’яўляецца вытворчасць, дастаўка і зборка дзіцячай мэблі для садка, — тлумачыць інжынер-тэхнолаг завода Дзмітрый Крупадзёраў. — З выездам ва ўстанову працуем другі тыдзень. Ёсць план, як будзе мэблявана кожнае памяшканне ўсіх трох паверхаў. Згодна з ім, указваю грузчыкам, куды разнесці тыя ці іншыя вырабы. А ўжо непасрэдна прывядзеннем іх у належны выгляд займаюцца зборшчыкі мэблі Генадзій Жук і Анатолій Купко.

З дапамогай шрубакрутаў яны збіраюць ложкі, гардэробныя і шафы для цацак, сталы, крэслы, а таксама гульнявыя модулі. Гэта стэлажы ў форме паравозікаў, замкаў, рабочага месца цырульніка і г.д. Мэбля, вырабленая на прадпрыемстве, запоўніць як дзіцячыя пакоі, так і кабінеты адміністрацыі дашкольнай установы.

Вераніка Філановіч. Фота аўтара