У адпаведнасці з пастановай Савета Міністраў №626 ад 3 лістапада 2020 года, з 20 лістапада ў Беларусі змяніліся правілы аказання паслуг паштовай сувязі агульнага карыстання.
Зараз паслугі можна аплачваць як пры адпраўцы паштовых адпраўленняў, так і пры іх атрыманні па тарыфах, дзеючых на дату аказання паслугі. Акрамя таго, пастанова прадугледжвае магчымасць выдачы пасылак і на падставе ідэнтыфікацыйных даных, атрыманых з дапамогай інфармацыйных паштовых тэхналогій.
Упарадкаваны прыём і выдача паштовых адпраўленняў у залежнасці ад вагі. Пасылкі меншыя за 10 кг прымаюцца і выдаюцца ва ўсіх аб’ектах аператара паштовай сувязі, большыя за 10 кг — у аб’ектах, вызначаных аператарам.
Адрасаты з 3 студзеня 2021 года змогуць атрымаць інфармацыю аб паступленні пасылак праз электронную пошту або СМС. Для гэтага адпраўшчыку неабходна пазначыць у паштовым адрасе нумар мабільнага тэлефона, электронны паштовы адрас нацыянальнай паштовай электроннай сістэмы або адрас электроннай пошты адрасата. Пры гэтым паведамленні на папяровым носьбіце не будуць дастаўляць на абаненцкі паштовы і індывідуальны паштовы адрасы.
БЕЛТА
