Гатуем з «Традыцыяй». Посны пірог з грыбамі

Культура

У вернікаў праваслаўнай і каталіцкай канфесій Вялікі пост. Але і ў гэты час на стале могуць быць смачныя і разнастайныя стравы. Гэта вам пацвердзіць любы ўдзельнік клуба нацыянальнай кухні, гульні і абраду «Традыцыя», што дзейнічае пры Цэнтры культуры і народнай творчасці раёна.

Дырэктар установы Ксенія Грэська (а яна таксама ўвахо­дзіць у склад самабытнага клуба) ведае нямала арыгінальных, а галоўнае — правераных рэцэптаў «сціплых» страў. Самая любімая з іх — посны пірог з грыбамі, які гаспадыня заўжды гатуе для сваіх блізкіх у перадвелікодны час.

— Я жартоўна называю яго лянівым: інгрэдыенты патрэбны самыя простыя, а працэс прыгатавання — нескладаны, — расказвала Ксенія Грэська, наразаючы напярэдадні спечаны пірог. — З калегамі з «Традыцыі» мы неаднойчы частавалі ім гасцей Пастаўшчыны і часта чулі ад іх словы захаплення.

Працэс прыгатавання пірага наступны. Высыпаем у глыбокую талерку (лепш керамічную) пачак сухіх дражджэй (11 г). Дабаўляем дробку мукі і цукру. Усё заліваем 4-5 сталовымі лыжкамі цёплай вады, размешваем. Накрываем пасудзіну і ставім у цёплае месца. Змешваем 0,5 л вады, па 2 чайныя лыжкі цукру і солі, 5-6 сталовых лыжак алею. У гэту сумесь праз хвілін 15 дадаём дрожджы, якія тым часам падняліся. Затым дабаўляем муку. Яе трэба столькі, колькі возьме цеста. Практыка паказала, што гэта прыблізна 20 сталовых лыжак з горкай. Цеста ў выніку атрымліваецца мяккае, падатлівае, адстае ад рук.

Яго ў закрытай пасудзіне ставім на хвілін 35-40 у халадзільнік. Тым часам рыхтуем начынку для пірага — робім бульбяное пюрэ, 0,5 л салёных грыбоў (можна замяніць смажанымі) змешваем з сырой, дробна парэзанай цыбулінай. Пюрэ і грыбы слаямі выкладваем на разраўнаванае на блясе цеста. З ім упраўляцца лягчэй, калі змазаць рукі алеем. А каб пірог атрымаўся не сухім, на ім можна зрабіць «сетку» з поснага маянэзу. Выпякаць пірог у ра­загрэтай духоўцы 20-25 хвілін пры тэмпературы 200оС.

Ксенія Грэська падкрэсліла: важна, каб у працэсе прыгатавання стравы ў пакоі не было скразняку. Нават лёгкі вецер можа сапсаваць якасць драж­джавога цеста.

Адзначым, што начынка ў пірага можа быць і не посная. Адзін з яе варыянтаў — курынае філе, цыбуля, чырвоны перац, змазаныя маянэзам і шчодра пасыпаныя свежымі пятрушкай і кропам. Увогуле, на свой густ можна выкарыстоўваць любыя інгрэдыенты. Кухня — гэта ж таксама месца для творчасці…

Іна Сняжкова. Фота аўтара



Читайте также:
Интервью с руководителем студии «Славия» и лауреатом звания «Человек года Поставщины» Оксаной Николаевой
В Доме ремесел «Стары млын» открылась выставка мастера по лозоплетению Марьяна Августиновича
Духовой оркестр Поставского колледжа — лауреат І степени областного видеоконкурса



Tagged

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.