Какие последствия принёс сильный ветер Поставскому району?

Не абмінуў і наш раён

У пятніцу, 14 студзеня, Міністэрства па надзвычайных сітуацыях разаслала грамадзянам СМС-паведамленні з просьбай быць уважлівымі і асцярожнымі з прычыны значнага ўзмацнення ветру. Чытаючы хроніку здарэнняў па рэспубліцы, можна сказаць, што ў нашым раёне вецер вялікай бяды не нарабіў. Але і не прайшоў бясследна.

З раніцы ў рэжым павышанай гатоўнасці перайшлі работнікі аддзела па над­звычайных сітуацыях, энергетыкі Пастаўскага РЭС, іншыя службы.

— Першыя пашкоджанні на высакавольтных лініях мы выявілі ў сярэдзіне дня, — расказваў начальнік РЭС Мікалай Ожэль. — Моцным ветрам ламаліся дрэвы і падалі на электраправады. Усяго было пашкоджана дзесяць ліній напружаннем10 кВ. Аварыйныя брыгады неадкладна выехалі на месцы аварый. На ліквідацыі наступстваў ветру працавала 6 брыгад нашага РЭС і 3 брыгады філіяла «Глыбоцкія электрасеткі». Яны рамантавалі нізкавольтныя лініі (усяго такіх заявак паступіла 47). Работы на высакавольтных ЛЭП ускладняліся тым, што абрывы выяўлялі ў лясных масівах, у цяжкадаступных месцах. Нашым работнікам даво­дзілася дабірацца да іх пехатой не па аднаму кіламетру. Не дабавіла тэмпаў рабоце энергетыкаў наступленне цемнаты. Пэўны час абясточанымі заставаліся некаторыя вуліцы Пастаў,  Камаі, Дунілавічы, Варапаева, Лынтупы і яшчэ амаль 60 населеных пунктаў раёна. Асноўныя работы па ліквідацыі наступстваў завяршылі толькі пасля апоўначы. У суботу іх прадоўжылі. Усе спецыялісты працавалі аператыўна, за што ім вялікі дзякуй.

Работнікам ЖКГ давялося прыбіраць вывернутыя з каранямі дрэвы насупраць магазіна «Лімончык» і каля дома №10 па вуліцы Станкевіча. Моцным ветрам сарвала уцяпляльнік з фасада дома №96 па вуліцы 17 Верасня, некалькі лістоў шыферу з даху дома №15 і вадасцёкавую трубу з дома №27 па вуліцы Юбілейнай.

— З пятніцы не змаўкаюць тэлефоны ў нашых страхавых агентаў, — расказвала намеснік дырэктара прадстаўніцтва Белдзяржстраху па Пастаўскім раёне Вольга Маслоўская. — У адных сарвала шыфер з даху, у другіх пашкодзіла полікарбанатныя цяпліцы, альтанкі, арэлі. Спецыялісты выехалі па ўказаных адрасах. Афармляюцца неабходныя дакументы, і пацярпелыя атрымаюць кампенсацыю.

А на лынтупскай метэа­станцыі тым часам зноў прагназуюць узмацненне ветру да 25 метраў у секунду. Будзьце асцярожныя!

Анна Анішкевіч