Вырасціць грыбы …на калодзе
Такую мэту паставілі перад сабой актыўныя наведвальніцы аддзялення дзённага знаходжання для грамадзян пажылога ўзросту ТЦСАН.
На працягу мінулага года ініцыятыўныя жанчыны Віцебскай вобласці, у тым ліку пастаўчанкі, удзельнічалі ў сацыяльным дабрачынным праекце, падчас якога вывучалі асновы вядзення аграбізнесу. Ініцыятарам праекта выступаў Беларускі дзіцячы фонд пры падтрымцы Віцебскага аблвыканкама і фонду «Кока-Кола». Удзельніцам бясплатна выдзялялася насенне, расада, удабрэнні, сродкі аховы раслін, матэрыял для парнікоў і іншае. Аматары земляробства не толькі атрымалі грунтоўныя веды ў галіне аграбізнесу, але і навучыліся прадукцыйна выкарыстоўваць свае зямельныя ўчасткі для вырошчвання агародніны як для сваіх патрэб, так і на продаж. Заняткі праводзілі вопытныя куратары — аграномы, эксперты ў галіне малога прадпрымальніцтва, фінансаў, маркетынгу, арганічнага земляробства. З многімі з іх у пастаўчанак завязалася цеснае супрацоўніцтва.
А сёлета аддзяленне дзённага знаходжання для грамадзян пажылога ўзросту ТЦСАН ініцыявала свой праект. Ён называецца «Грыбнічок».
— Нам будзе выдзелены ўчастак побач з аддзяленнем. Там размесцім бярозавыя калоды, на якіх будзем вырошчваць грыбы, — расказвала мадэратар праекта Аксана Дробышава. — Дапамагаць у гэтым нам будзе дацэнт кафедры эканомікі і кіравання інстытута прадпрымальніцкай дзейнасці Анатолій Спрынчак. З ім мы знаёмыя з папярэдняга праекта. Ён вопытны гаспадарнік. Працоўную дзейнасць пачынаў з пасады агранома ў родным Талачынскім раёне. Затым кіраваў сельгаспрадпрыемствам, выкладаў у Беларускім аграрна-тэхнічным універсітэце, Акадэміі кіравання пры Прэзідэнце Рэспублікі Беларусь. Падчас рэалізацыі праекта па асновах аграбізнесу часта чытаў у нас лекцыі. Мы добра памятаем яго цікавыя выступленні.
Нядаўна прайшлі першыя тэарэтычныя заняткі па праекце «Грыбнічок». На іх прысутнічалі зацікаўленыя асобы не толькі з нашага раёна, але і з Шаркаўшчынскага. На сустрэчу прыехала аграном з Глыбокага Аляксандра Плыгаўка, якая на Пастаўшчыне курыравала рэалізацыю папярэдняга праекта. Прысутныя пазнаёміліся з асновамі грыбаводства. Анатолій Спрынчак расказаў таксама пра абрэзку пладовых дрэў, якая актуальная ў сакавіку. Яму задавалі шмат пытанняў, і на ўсе Анатолій Іванавіч даваў кампетэнтныя адказы.
— Мы плануем не толькі вырошчваць грыбы, але і стварыць у тым месцы спецыяльную зону адпачынку, — гаварыла Аксана Дробышава. — Установім лавачкі, парасоны ад сонца, дзе будзе магчымасць ладзіць літаратурныя сустрэчы, невялікія канцэрты. Ініцыятыў шмат, жадаючых іх ажыццяўляць — таксама. Таму спадзяюся, што ўсё ў нас атрымаецца.
Анна Анішкевіч
