Страта баявой адзінкі
Адлюстроўванне паветранай абстаноўкі, баявыя дзяжурствы, жыццё па статуце… Ваеннай справе пастаўчанка Наталля Грыневіч прысвяціла чвэрць стагоддзя. Зараз усе складнікі армейскай службы для яе засталіся ў мінулым: яфрэйтар кантрактнай службы 1-га радыётэхнічнага цэнтра звольнена ў запас.
— Для нашай воінскай часці гэта страта баявой адзінкі. Праверанай і надзейнай. Таму нам так шкада з вамі развітвацца! — сцвярджаў на ўрачыстым пастраенні з прычыны звальнення ў запас ваеннаслужачай камандзір 1-га РТЦ Дзмітрый Дзевятоўскі. — Калі я прыйшоў у падраздзяленне малодшым лейтэнантам, вы ўжо добрасумленна выконвалі задачы па нясенні баявога дзяжурства, дзяліліся са мной уласным досведам, у чымсьці дапамагалі. Упэўнены, што ў цэнтры няма такога чалавека, які б не звяртаўся да вас па дапамогу. І вы ніколі не адмаўлялі. Ад усяго воінскага калектыву жадаю здароўя, шчасця, сямейнага дабрабыту і мірнага неба. Няхай у вас усё атрымліваецца!
У воінскую часць Наталля Анатольеўна ўладкавалася па прапанове былога камандзіра Анатолія Красоўскага. Падраздзяленне ў той час якраз пераехала з Мышак у Паставы. І яна хоць і была далёкая ад арміі, пагадзілася. Час быў цяжкі, трэба было працаваць, а яна пасля 5 гадоў работы выхавальнікам у дзіцячым садку трапіла пад скарачэнне, бо мела маленькі стаж. Ва Узброеных Сілах пачынала аператарам рухомай радыёлакацыйнай станцыі П-37, потым яе перавялі на комплекс сродкаў аўтаматызацыі. Апошнія 7 гадоў служыла старшым планшэтыстам каманднага пункта. У падраздзяленні сустрэла і свой лёс. Разам з мужам выгадавалі сына. Межы паміж домам і работай сцёрліся.
— Вы для мяне — сям’я, — дзякавала ў адказ былым саслужыўцам Наталля Грыневіч. — Дзякуючы добрым камандзірам, шчырым адносінам у калектыве, узаемавыручцы і чалавечнасці кожнага 25 гадоў службы праляцелі як адно імгненне. Для мяне ўсё найлепшае і светлае звязана з арміяй. Тут існуе свая сістэма простых і зразумелых жыццёвых каштоўнасцей, моцныя традыцыі. Няхай і ваша служба пройдзе так жа лёгка, як мая.
У цэнтры Наталля Грыневіч пасля сябе пакідае змену: днямі на кантрактную службу сюды ўладкаваўся яе стрыечны пляменнік Мацвей Хаткевіч. Так бы мовіць, новая баявая адзінка.
Вераніка Філановіч
