Выбіраем студатрад. Такую назву мае рэспубліканскі промапраект.
Галоўная яго мэта — расказаць маладым людзям пра магчымасці працаўладкавання летам. Зарабіць грошы падчас канікул змогуць і пастаўчане: у раёне будуць арганізаваныя вытворчыя, сельскагаспадарчыя і экалагічны атрады. Як туды трапіць і колькі можна зарабіць за змену? Адказы на гэтыя пытанні прагучалі 1 красавіка ў Пастаўскім дзяржаўным каледжы. У рамках названага промапраекта перад навучэнцамі 1—3 курсаў выступіла першы сакратар райкама БРСМ Кацярына Малевіч.
— Летась у студэнцкіх атрадах шчыравала 265 чалавек, у ліку якіх былі і навучэнцы каледжа, — расказвала яна. — Сёлета і вы, і старшакласнікі зноў можаце далучыцца да студатрадаўскага руху. Для гэтага вам патрэбна загадзя запоўніць анкету на працаўладкаванне. Зрабіць гэта можна ў райкаме БРСМ або ў электронным выглядзе ў тэлеграм-канале «Белорусские студенческие отряды». Пасля запаўнення анкеты будуць перанакіраваныя ў райкам. Дарэчы, нядаўна на канале з’явіўся чат-бот, які расказвае пра гісторыю студатрадаўскага руху, профілі студатрадаў.
У студатрады прымаюць юнакоў і дзяўчат ва ўзросце ад 14 гадоў. У ліпені—жніўні ім прапануюць папрацаваць у вытворчых і сельскагаспадарчых атрадах у ААТ «Паставымэбля», «Хацілы-агра», «Навасёлкі-Лучай» і, магчыма, у ААТ «Сцяг Перамогі-агра». У чэрвені—ліпені ўпершыню за апошнія гады будзе створаны экалагічны атрад у Пастаўскім лясгасе (тут давядзецца пашчыраваць на праполцы саджанцаў у гадавальніку ў Азёрках).
Сёлета праз райкам БРСМ плануецца працаўладкаваць каля 300 юнакоў і дзяўчат.
— Зарабіць за месяц можна ад 450 рублёў, — тлумачыла Кацярына Малевіч. — Працоўны дзень доўжыцца з 8 раніцы да 16 гадзін з перапынкам на абед. Усе дакументы для працаўладкавання афармляе райкам БРСМ. З 1 чэрвеня будзем фарміраваць базу жадаючых трапіць у студатрады. Таму, калі ёсць жаданне падзарабіць летам, звяртайцеся загадзя. А калі ўзнікнуць пытанні па арганізацыі дзейнасці студатрадаў, тэлефануйце ў райкам на нумар 2-39-71.
Некаторыя навучэнцы каледжа запоўнілі анкеты адразу пасля завяршэння мерапрыемства. Хтосьці з іх пойдзе шчыраваць у студатрад другі год запар. Хіба не гэта пацвярджае іх запатрабаванасць?
Іна Сняжкова
