Ацанілі работу, выбралі новага лідара
У чацвер адбыўся VI пленум райкама Беларускага прафсаюза работнікаў культуры, інфармацыі, спорту і турызму.
На яго былі запрошаны кіраўнікі ўстаноў і старшыні пярвічак галіновага прафсаюза. У рабоце пленума ўдзельнічалі старшыня абласной арганізацыі Беларускага прафсаюза работнікаў культуры, інфармацыі, спорту і турызму Алена Сабірава, начальнік аддзела ідэалагічнай работы, культуры і па справах моладзі райвыканкама Галіна Чаплінская, старшыня раённага аб’яднання прафсаюзаў Іна Далецкая.
Справаздачу пра дзейнасць раённай арганізацыі за перыяд з ліпеня 2019 года па ліпень 2022-га зрабіла старшыня райкама прафсаюза Валянціна Друсь.
Раённая прафсаюзная арганізацыя работнікаў культуры, спорту і турызму аб’ядноўвае 7 пярвічных арганізацый і налічвае амаль 300 чалавек. Адным з прыярытэтных напрамкаў яе работы з’яўляецца сацыяльнае партнёрства. Яно рэалізуецца праз заключэнне калектыўных дагавораў і пагадненняў паміж кіраўніцтвам арганізацый і прафсаюзам. Сёлета ў аддзеле эканомікі райвыканкама зарэгістравана 8 такіх дакументаў.
Аналізуючы дзейнасць райкама прафсаюза, яго лідар звярнула ўвагу на тое, што грамадскае аб’яднанне пастаянна трымае на кантролі працоўныя і сацыяльна-эканамічныя інтарэсы членаў прафсаюза. З гэтай мэтай рэгулярна праводзіцца маніторынг выканання заканадаўства аб ахове працы, вялікая ўвага ўдзяляецца аздараўленню работнікаў, развіваецца культурна-масавая і турыстычная работа. Прафсаюз клапоціцца не толькі пра сваіх членаў, але і пра іх дзяцей. Традыцыйная дабрачынная акцыя так і называецца «Прафсаюзы — дзецям». Яна праводзіцца напярэдадні Дня ведаў, Каляд і Новага года. Не абдзеленыя ўвагай прафсаюза маладыя спецыялісты, ветэраны працы.
Справаздачу аб рабоце рэвізійнай камісіі зрабіла яе старшыня Ксенія Грэська.
У абмеркаванні дакладаў прынялі ўдзел старшыні пярвічных прафсаюзных арганізацый: раённай бібліятэкі — Ірына Жукян, дзіцячай школы мастацтваў імя А. Тызенгаўза — Паліна Кладніцкая. Яны далі станоўчую ацэнку рабоце райкама прафсаюза.
Высока ацанілі дзейнасць раённай арганізацыі Беларускага прафсаюза работнікаў культуры, інфармацыі, спорту і турызму Алена Сабірава, Галіна Чаплінская, Іна Далецкая і ўручылі Валянціне Друсь граматы і падарункі.
У сувязі з тым, што Валянціна Друсь назначана на пасаду дырэктара Пастаўскага раённага краязнаўчага музея, адбыліся выбары новага старшыні райкама прафсаюза работнікаў культуры, інфармацыі, спорту і турызму. Ім стала вядучы спецыяліст Цэнтра культуры і народнай творчасці Пастаўскага раёна Вольга Лойка.
Анна Анішкевіч
