Цыбуля б’е рэкорды
Прыемна, што чытачы «Пастаўскага краю» ахвотна адклікаюцца на публікацыі ў газеце. Вось і тыдзень таму мы змясцілі на яе старонках фотаздымкі ўраджайнага часнаку і цыбулі, вырашчаных Наталляй Нямчынскай на дачным участку ў Рабеках, і запрасілі жыхароў раёна дасылаць у рэдакцыю свае фота веліканаў на градках. І яны сталі прыходзіць на электронную пошту рэдакцыі або журналістам у «Вайберы».
Рэкорды б’е цыбуля. Так, пастаўчанка Святлана Бакуновіч даслала здымкі цыбулі, адна галоўка якой заважыла… 1 кілаграм 63 грамы. І не прамінула адзначыць, што такі ўраджай вырасціў яе гаспадарлівы муж Ігар.
Яшчэ некалькі кадраў даслала Марына Міхновіч з Хаціл. Піша, што такую цыбулю (адна галоўка вагой 800 грамаў) вырасціла з насення яе мама Яніна Волк, якая таксама жыве ў Хацілах.
Жыхара райцэнтра Івана Кісяля парадаваў вырашчаны ім ураджай цыбулі і часныку. Галоўкі лука дасягаюць 400 грамаў.
Чакаем новых здымкаў! Хто можа пахваліцца бульбай, кабачкамі, агуркамі, памідорамі і іншай агароднінай?
Фаіна Касаткіна
Фота Святланы Бакуновіч і Марыны Міхновіч
