У розных стылях і напрамках
Адразу дзве выставы — «Зімовыя святы і абрады Пастаўшчыны» і «Калядныя цуды» — адкрыліся на мінулым тыдні ў Доме рамёстваў «Стары млын».
Першая размясцілася ў малой зале Дома рамёстваў і складаецца пераважна з работ яго супрацоўнікаў. Яны апавядаюць пра тое, як даўней на Пастаўшчыне рыхтаваліся да Каляд і Новага года і сустракалі іх, а таксама як праводзілі зіму. Па словах дырэктара «Старога млына» Таццяны Петух, з наступнага года ў гэтай зале будуць ладзіцца толькі выставы, прысвечаныя традыцыйным народным святам і абрадам беларусаў, з прывязкай да іх па часе. І цяперашняя экспазіцыя адкрывае гадавы цыкл.
У вялікай зале прадстаўлены работы ўдзельнікаў народнага клуба «Майстры» пад кіраўніцтвам Алены Крывенькай. Гэта выстава аб’яднала таленавітых мастакоў і майстроў дэкаратыўна-прыкладной творчасці раёна, якія працуюць у розных стылях і напрамках. Тут можна ўбачыць маляўнічыя пейзажы і нацюрморты жывапісца-самавучкі Сяргея Фарманюка і вышываныя бісерам карціны Леанарды Івановай, звязаныя кручком сурвэткі і шалі Галіны Калдышкінай і дзіўныя цацкі Алены Аўраменкі. Побач зваленыя з воўны адзенне і аксесуары Анжалікі Рагуты, сплеценыя з лазы і папяровых трубачак вырабы Уладзіміра Зарэцкага і Алы Жук, саламяныя і вышываныя работы Крысціны Брэскай, абрэзкавае шыццё Раіны Лушчык, кераміка Вольгі Сафонавай, маляванка Вольгі Гукавай, тканыя паясы, ручнікі і габелены Алены Крывенькай.
На жаль, не ўсе аўтары змаглі прысутнічаць на адкрыцці выставы. Тыя ж, хто прыйшоў на яго, расказалі пра сябе і сваё захапленне. А метадыст Дома рамёстваў Крысціна Брэская, акрамя таго, дала майстар-клас па вырабе навагодняй цацкі ў тэхніцы саламянай пластыкі. На развітанне Алена Крывенькая пажадала калегам па клубе здароўя, невычэрпнай энергіі і рэалізацыі творчых задум.
Алена Шапавалава
