Сямейнае шчасце ў лічбах
Самымі важнымі падзеямі ў жыцці кожнага чалавека з’яўляюцца ўступленне ў шлюб і нараджэнне дзяцей. Прапануем чытачам «ПК» азнаёміцца з інфармацыяй аддзела ЗАГС райвыканкама пра зарэгістраваныя на Пастаўшчыне ў 2022 годзе шлюбы і нараджэнні.
Усяго за мінулы год у нашым раёне зарэгістравана 149 шлюбаў, з іх аддзелам ЗАГС — 115, сельскімі выканкамамі — 34. Сямейныя саюзы заключалі ў асноўным грамадзяне Рэспублікі Беларусь. 4 шлюбы зарэгістраваны з грамадзянамі Расійскай Федэрацыі, 1 — Украіны. Сярэдні ўзрост мужчын, якія вырашылі афіцыйна стварыць сям’ю, склаў 32 гады, жанчын — 30 гадоў. Пры гэтым самай юнай нявесце на момант рэгістрацыі было 17 гадоў, самаму маладому жаніху — 18. Максімальны ўзрост нявесты пры ўступленні ў шлюб аказаўся 57 гадоў, жаніха — 65.
Летась на Пастаўшчыне на свет з’явіліся 184 дзіцяці: 93 хлопчыкі і 91 дзяўчынка. На жаль, у параўнанні з папярэднім годам колькасць нованароджаных зменшылася на 60 малых. Але радуе, што яны нараджаюцца пераважна ў поўных сем’ях. Так, 154 дзіцяці зарэгістраваны ў бацькоў, якія знаходзяцца ў шлюбе, і толькі 30 — у маці-адзіночак. Як сведчаць даныя, у апошнія гады маладыя людзі не спяшаюцца заводзіць дзяцей і становяцца бацькамі часцей за ўсё ў 25—35 гадоў. Менавіта ў такім узросце шчасце мацярынства адчулі 98 пастаўчанак, бацькоўства — 90 пастаўчан. Сярэдні ж узрост маці склаў 29 гадоў, бацькі — 31. Адна з жыхарак раёна стала мамай у 15 гадоў, 10 жанчын — пасля 40. Самаму маладому тату споўніўся 21 год, самаму пажылому — 52 гады.
Што да самых папулярных імёнаў, якія давалі сваім дзеткам бацькі, то рэйтынг жаночых узначалілі Сафія (так назвалі 6 дзяўчынак), Аліса, Ксенія (па 5), Аляксандра, Ганна, Васіліса, Паліна і Ульяна (па 4). Сярод мужчынскіх лідзіруюць Мацвей, Цімафей (іх носяць па 8 хлопчыкаў), Марк (7), Арцём, Данііл (па 5), Аляксандр, Ілья і Міхаіл (па 4). Некаторыя малыя атрымалі рэдкія імёны, такія як Аўрэлія, Амілія, Ася, Марыка, Даміра, Герман, Дзям’ян, Маісей, Савелій, Эльдар. Двайнымі імёнамі летась дзяцей не называлі.
Падрыхтавала Алена Шапавалава
