З 23 па 30 красавіка ў Рэспубліканскім цэнтры алімпійскай падрыхтоўкі адбылося першынство Беларусі па шахматах сярод юнакоў і дзяўчат да 12, 14 і 16 гадоў.
За права стаць чэмпіёнам змагаліся 164 юныя спартсмены з Мінска, Віцебска, Брэста, Гродна, Гомеля, Баранавіч, Пастаў, Полацка, Кобрына, Рагачова, Глыбокага, Магілёва, Пінска, Светлагорска.
На самых прэстыжных спаборніцтвах краіны Віцебскую вобласць прадстаўляла чатырохразовая чэмпіёнка вобласці Ева Іванова (СШ №2 імя Н. М. Асяненкі). У стартавы пратакол турнірнай табліцы сярод дзяўчат да 14 гадоў былі ўнесены прозвішчы 21 юнай прадстаўніцы старажытнай гульні. Ажно 13 з іх мелі міжнародны заліковы рэйтынг, а гэта значыць прымалі ўдзел у спаборніцтвах за межамі Беларусі.
Гулялі па швейцарскай сістэме ў 9 тураў, дзе на абдумванне хадоў кожнай саперніцы давалася гадзіна. На заключным этапе спаборніцтваў прымалі ўдзел усе наймацнейшыя шахматысткі краіны, сярод якіх было 6 кандыдатаў у майстры спорту Рэспублікі Беларусь і чэмпіёнка свету сярод дзяўчынак да 10 гадоў Ніка Венская (Мінск).
Усяго Ева Іванова правяла 9 партый, з іх перамогу святкавала ў пяці. У выніковай табліцы яна падзяліла 7—10-е месца і адстала ўсяго на адно ачко ад бронзавага прызёра. Такога поспеху на рэспубліканскіх турнірах пастаўчанка дабілася ўпершыню. Віншуем!
Юрый Катовіч
