— У Палацы Рэспублікі, дзе з Пасланнем беларускаму народу і Нацыянальнаму сходу выступаў Прэзідэнт Беларусі, прысутнічаў і біскуп Віцебскай дыяцэзіі Алег Буткевіч, які з’яўляецца Старшынёй Канферэнцыі Каталіцкіх Біскупаў у Беларусі. Аляксандр Лукашэнка закрануў шмат надзённых тэм. Сярод іх — адраджэнне традыцыі вялікай, дружнай, поўнай — класічнай! — сям’і. І зазначыў, што голас прадстаўнікоў усіх рэлігійных канфесій павінен гучаць мацней.
Каталіцкі Касцёл пастаянна выступаў і выступае ў абарону традыцыйных сямейных каштоўнасцей і супраць прапаганды гомасексуалізму і іншых палавых адхіленняў. Заходняя мода на чайлдфры набірае папулярнасць. Тое, чаго раней немагчыма было нават уявіць, сёння многім, а асабліва моладзі, здаецца прыцягальным. Будучыня не толькі Касцёла, Царквы, але і ўсяго свету, у тым ліку і беларускага грамадства, менавіта за моладдзю. На якім базісе выхаваем падрастаючае пакаленне, такім яно і будзе. Трэба тлумачыць маладым, што жыццёвыя дасягненні бессэнсоўныя, калі іх няма каму перадаць, што нажытыя багацці не заменяць шчасця бачыць, як працягваецца твой род.
Апошнім часам нямногія сямейныя пары жадаюць мець столькі дзяцей, колькі ім дасць Бог. Як правіла, гэта людзі глыбокарэлігійныя. Ёсць такія і ў маёй парафіі. Напрыклад, Рычард і Яня Радзюшы выхавалі чацвярых дзяцей. Усе — практыкуючыя католікі. У сям’і Івановых пяць сыноў і дачушка. Іх мама Святлана, акрамя выхавання дзетак, паспявае весці курсы па вывучэнні метадаў распазнавання плоднасці, з’яўляецца адной з арганізатараў сямейных баляў.
Сёння маладыя будуюць раскошныя катэджы, у якіх сучасная мэбля і бытавая тэхніка, толькі не чуваць дзіцячых галасоў. Дзяржава аказвае значную падтрымку сем’ям: водпуск па доглядзе дзіцяці да трох гадоў, сямейны капітал, ільготы на будаўніцтва жылля і многае іншае. Вядома, адказнасць за выхаванне дзяцей ляжыць на бацьках. І многія яе баяцца, хочуць жыць толькі для сябе.
Аборты, разводы, аднаполыя шлюбы — існуючых праблем, на жаль, вельмі шмат. Калі мы не будзем вучыць людзей рабіць правільны выбар — на карысць жыцця, а не смерці, — то ў будучыні чалавецтва чакае гібель. Каталіцкі Касцёл, Праваслаўная Царква праводзяць вялікую работу па папулярызацыі сямейных каштоўнасцей. У пастаўскай парафіі Святога Антонія Падунскага кожны першы панядзелак месяца ладзяцца сустрэчы сем’яў, на якіх з удзелам святара муж і жонка вучацца будаваць свае адносіны, умацоўваць сям’ю, выхоўваць дзяцей, працаваць над сваім характарам і многае іншае.
Сям’я — крыніца любові, павагі, салідарнасці і прыхільнасці, тое, на чым будуецца любое цывілізаванае грамадства, без чаго не можа існаваць чалавек. Яна была і застаецца захавальніцай традыцый, культуры і гістарычнай спадчыны пакаленняў, гарантам стабільнасці і развіцця. Будзем імкнуцца, каб у Беларусі сямейныя каштоўнасці сталі нацыянальнай ідэнтычнасцю.
