«Лірнікі» (Брэсцкая вобласць)
Народны ансамбль народнай музыкі сваю творчую біяграфію адлічвае з 1976 года. Яго кіраўнік — Таццяна Купрык. У 2002-м калектыву прысвоена званне «народны». Ён папулярызуе беларускія традыцыі, народныя песні і музыку, выконвае і творы іншых народаў. Адметнай рысай гурта з’яўляюцца ўласныя апрацоўкі канцэртмайстра калектыву Віталія Купрыка.
«Лірнікі» — актыўныя ўдзельнікі мерапрыемстваў раённага і абласнога ўзроўняў, жаданыя госці на канцэртных пляцоўках краін замежжа.
«Гарадніца» (Гродзенская вобласць)
Народны ансамбль песні заснаваны ў 1988 годзе. У 1990-м атрымаў званне «народны аматарскі калектыў». Кіраўнік калектыву — Аляксандр Сувораў.
Асноўнай мэтай дзейнасці ансамбля з’яўляецца захаванне фальклорнай спадчыны Панямоння, прывіванне любові да народнай песні, вакальна-харавога мастацтва. Сакавіты гумар у спалучэнні з добрай песняй, аздобленай народнай харэаграфіяй і старадаўняй вясковай музыкай, — візітоўка «Гарадніцы».
У рэпертуары калектыву — беларускія народныя песні. Яго ўдзельнікі граюць на гармоніках, старадаўніх баянах, цымбалах, скрыпцы, басэтлі, барабане, бубне і інш.
«Гарадніца» з’яўляецца ўдзель- нікам і пераможцам гарадскіх, раённых, абласных, рэспубліканскіх, міжнародных аглядаў-конкурсаў і фестываляў.
«Калейдаскоп» (Гомельская вобласць)
Народны ансамбль народных iнструментаў «Калейдаскоп» — гэта самабытны калектыў, які складаецца з ліку прафесійных музыкаў. Створаны ў 2000 годзе, кіраўнік — Таццяна Ліпніцкая.
У рэпертуары ансамбля — народная музыка (беларускія, рускія песні і бытавыя танцы), аркестравыя найгрышы i эстрадная музыка. Самабытнасць і музычныя фарбы калектыву ствараюць скрыпка, гармонік, баян, цымбалы, домра, балалайка, кантрабас, ударныя інструменты. Ансамбль з’яўляецца лаўрэатам розных фестываляў і конкурсаў. Усіх яго артыстаў аб’ядноўвае любоў да народнай песні, жаданне зберагчы жамчужыны народнай музыкi.
Творчая дзейнасць калектыву накіравана на захаванне і развіццё традыцый, папулярызацыю найлепшых узораў народнага і класічнага музычнага мастацтва.
«Дударыкі» (Мінск)
Заслужаны аматарскі калектыў Рэспублікі Беларусь фальклорны ансамбль «Дударыкі» заснаваны ў 1970/1971 навучальным годзе. Мастацкі кіраўнік — Дзмітрый Ровенскі.
Калектыў тройчы атрымліваў гранты Прэзідэнта краіны па падтрымцы таленавітай моладзі. У 2010 г. яму прысвоена ганаровае званне «Заслужаны аматарскі калектыў Рэспублікі Беларусь». За час сваёй дзейнасці ансамбль даў больш за 1 800 канцэртаў (звыш 500 за мяжой). У рэпертуары — разнастайныя народныя песні, танцы, найгрышы на старадаўніх інструментах.
«Славяначка» (Магілёўская вобласць)
Ансамбль цымбалістаў арганізаваны ў 2000 годзе з ліку настаўнікаў школы ў Крычаве. Яго кіраўнік — Ала Вінаградава. Званне «народны» прысвоена калектыву ў 2005-м. Ён прапагандуе музычнае мастацтва, прымаючы актыўны ўдзел ва ўсіх мерапрыемствах і канцэртах. Выступленні калектыву заўсёды праходзяць з вялікім поспехам.
У рэпертуары «Славяначкі» — творы не толькі беларускіх аўтараў, але і замежных, рускіх кампазітараў, кампазітараў-класікаў, апрацоўкі народных песень і танцаў.
«Верхнядзвінскія музыкі» (Віцебская вобласць)
Калектыў створаны ў 2009 годзе. Кіраўнік — Мая Рубель. «Верхнядзвінскія музыкі» — гэта інструментальнае трыа народнага ансамбля народнай музыкі Верхнядзвінскага раённага цэнтра культуры і народнай творчасці ў складзе Маі Рубель, Іны Гарбатавай і Ігара Новікава. Музыканты граюць на гармоніку, традыцыйных духавых і струнных інструментах і інш.
Cymbals band (Мінская вобласць)
Інструментальны ансамбль створаны ў 2015 годзе. Яго заснавальнікам і кіраўніком з’яўляецца Юлія Саункіна. Удзельнікі калектыву — вучні ва ўзросце ад 9 да 17 гадоў: скрыпачы, баяністы, акардэаністы, групы духавых і ўдарных інструментаў. У рэпертуары ансамбля — творы рускіх, беларускіх і замежных кампазітараў і аўтараў. Асаблівая ўвага нададзена творам беларускіх кампазітараў, і гэта яркі прыклад папулярызацыі і прапаганды беларускай інструментальнай музыкі. Калектыў выконвае і сучасныя кампазіцыі.
Кожны канцэртны нумар — маленькае свята з цікавымі знаходкамі і элементамі шоу. Яшчэ адной адметнасцю калектыву з’яўляецца асаблівы падыход да сцэнічнага вобразу.
Цымбальны ансамбль вядзе актыўную канцэртную і конкурсную дзейнасць, выступаючы на канцэртных пляцоўках Смалявіцкага раёна і за яго межамі. Ён лаўрэат і дыпламант абласных, рэспубліканскіх, міжнародных конкурсаў і фестываляў.
«Метелица» (Расія, г. Пушкіна)
Ансамбль рускіх народных інструментаў быў арганізаваны ў 1987 годзе. Кіраўнік — лаўрэат усерасійскіх і міжнародных конкурсаў Аляксандр Малькоў.
У рэпертуары «Метелицы» — аўтарскія п’есы заснавальніка калектыву, дырыжора і кампазітара, заслужанага работніка культуры Расіі Льва Колесава, а таксама аранжыроўкі кампазітараў розных стыляў і эпох.
Калектыў знаходзіцца ў пастаянным творчым пошуку, не баіцца арыгінальных музычных эксперыментаў. Выступленні заўсёды праходзяць на высокім творчым і тэхнічным узроўні выканання. Натхнёная віртуозная ігра музыкантаў нікога не пакідае абыякавым.
У творчым багажы ансамбля шматлікія выступленні на канцэртных пляцоўках, гастролі па Расіі і блізкім замежжы, удзел у міжнародных фестывалях і конкурсах.
«Достык-Дружба» (Рэспубліка Казахстан)
Ансамбль народнай песні створаны ў 2013 годзе. Яго кіраўнік — лаўрэат міжнароднага фестывалю «Каспий — море дружбы-2006» Сяргей Саяпін. Калектыў з’яўляецца лаўрэатам Паволжскага песеннага фестывалю «Расцвела под окошком белоснежная вишня» (г. Самара, 2013 і 2014 гг.), дыпламантам міжнароднага фестывалю «Песня без границ» (г. Астана, 2015 г.), лаўрэатам міжнароднага фестывалю-конкурсу «Жар-птица» (г. Казань, 2023 г.).
Integration (Кітай)
Гэта таленавітыя студэнты і магістранты Віцебскага дзяржаўнага ўніверсітэта імя П. М. Машэрава, удзельнікі шматлікіх мерапрыемстваў гарадскога і рэспубліканскага маштабаў, неаднойчы заваёўвалі Гран-пры ў міжнародных конкурсах. Мастацкія кіраўнікі калектыву — Таццяна Дзенісенка і Вольга Жукава. Артысты выступяць з вакальна-харэаграфічнай кампазіцыяй «Расказ мангольскай дзяўчыны».
Чжао Ісюань і Гао Кэсінь (Кітай)
Абедзве — студэнткі III курса Віцебскага дзяржаўнага ўніверсітэта імя П. М. Машэрава, атрымліваюць спецыяльнасць «Музычнае мастацтва, рытміка і харэаграфія».
Гао на кітайскім традыцыйным інструменце жуань выканае кітайскую народную музыку «Стэпавыя прасторы», Чжао на гучжэн — інструментальную кампазіцыю «Малюнак роднай зямлі». Мастацкія кіраўнікі артыстак — Таццяна Дзенісенка і Вольга Жукава.
Айгул Сапаргулыева (Туркменістан)
Айгул з’яўляецца студэнткай ІV курса Віцебскага дзяржаўнага ўніверсітэта імя П. М. Машэрава і набывае спецыяльнасць «Біялогія (навукова-педагагічная дзейнасць)». Галоўным захапленнем у сваім жыцці лічыць музыку. У Туркменістане Айгул скончыла музычную школу, дзе асвоіла ігру на традыцыйным шчыпковым музычным інструменце — дутары. З’яўляючыся студэнткай, Айгул не пакідае заняткаў на інструменце, сістэматычна практыкуецца і актыўна ўдзельнічае ва ўніверсітэцкіх мерапрыемствах.
Мастацкія кіраўнікі — Таццяна Дзенісенка і Вольга Жукава.
«Паўлінка» (Латвія, г. Ліепая)
Ансамбль беларускай песні створаны ў 2000 годзе, яго кіраўнік — Жанна Буйніцкая. Самадзейны калектыў аб’яднаў землякоў — аматараў песні з розных куткоў Беларусі, якія па волі лёсу жывуць у Латвіі.
Удзельнікі ансамбля займаюцца творчасцю пад дэвізам: «Шануй Латвію, але ў сэрцы захоўвай Беларусь!». Яны знаёмяць слухачоў з беларускай культурай: абрадамі, песнямі і традыцыямі. Калектыў з’яўляецца ўдзельнікам гарадскіх і рэспубліканскіх свят, фестываляў, Дзён нацыянальных культур, падтрымлівае сувязь з беларускімі дыяспарамі Літвы і Эстоніі. З задавальненнем і радасцю прымае запрашэнні ў Беларусь для ўдзелу ў канцэртах, фестывалях і іншых мерапрыемствах.
«Спадчына» (Латвія, г. Даўгаўпілс)
Харавая капэла пад кіраўніцтвам Сяргея Братусёва сёлета адзначыла сваё 10-годдзе. Рэпертуар калектыву шырокі. Яго аснову складаюць беларускія і латышскія народныя песні духоўнага напрамку. Музычнае суправаджэнне — акардэон, піяніна, скрыпка, гітара, музычныя апрацоўкі.
Калектыў з’яўляецца пастаянным удзельнікам Свята Даўгаўпілса, Дня беларускай культуры ў Даўгаўпілсе, шматлікіх канцэртаў, праектаў і вечарын.
«Журавінка» (Латвія, г. Вентспілс)
Ансамбль беларускай песні Вентспілскага гарадскога Цэнтра культуры адлік сваёй творчай дзейнасці пачаў у 2002 годзе. Нязменны мастацкі кіраўнік калектыву — Анжаліка Зрайчанка.
«Журавінка» захоўвае і папулярызуе народныя песенныя традыцыі беларусаў, знаёмячы з імі жыхароў Латвіі. Ансамбль з’яўляецца пастаянным удзельнікам разнастайных міжнародных конкурсаў і фестываляў, выступаў з канцэртамі ў шматлікіх гарадах Беларусі.
