На працягу шасці дзён у Віцебску ў рамках «Славянскага базару» ладзіліся канцэрты, праходзілі іншыя мерапрыемствы. Не толькі яго гледачамі, але і ўдзельнікамі сталі і пастаўчане. Фестываль завяршыўся, а яркія эмоцыі засталіся.
Анастасія Пятрова, першы сакратар райкама БРСМ:
— Падчас «Славянскага базару» Віцебск становіцца не толькі цэнтрам творчасці, але і сталіцай актыўнай і таленавітай моладзі. На шэрагу мерапрыемстваў пабывалі і 12 маладых пастаўчан: удзельнічалі ў патрыятычнай акцыі, у шэсці з нагоды адкрыцця Дня моладзі «Мы в моменте», што адбылося каля канцэртнай залы «Віцебск», прысутнічалі на дыялогу, спікерамі якога былі дзяржаўны сакратар Саюзнай дзяржавы Дзмітрый Мезенцаў, міністр адукацыі Беларусі Андрэй Іванцоў і першы сакратар ЦК «БРСМ» Аляксандр Лук’янаў. Падтрымлівалі ўдзельнікаў фестывалю-конкурсу «Агонь маладзёжных талентаў». Для нас праводзіліся майстар-класы па асновах інфармацыйнага супрацьборства, практычныя заняткі па апрацоўцы фотаздымкаў, стварэнні якаснага і цікавага медыякантэнту. Кульмінацыяй Дня моладзі стаў гала-канцэрт закрыцця «Славянскага базару», на якім выступілі папулярныя артысты Ягор Кан, Данііл Мышкавец, Кірыл Громаў і многія іншыя.
Ксенія Грэська, дырэктар Цэнтра культуры і народнай творчасці раёна:
— Віцебск у дні «Славянскага базару» ператвараецца ў вялікую святочную пляцоўку. Гучаць песні на розных мовах, людзі гуляюць па «Горадзе майстроў», наведваюць канцэрты, спыняюцца ля інтэрактыўных пляцовак раёнаў. Мы сёлета прэзентавалі Пастаўшчыну, якая адзначае 290-гадовы юбілей Антонія Тызенгаўза. З роллю заснавальніка нашага горада ўдала справіўся рэжысёр Юнькаўскага сельскага Дома культуры Валерый Жукян. У правядзенні культурнай праграмы яму дапамагалі работнікі Цэнтра культуры і народнай творчасці Вольга Лойка, Таццяна Карпава, а таксама кіраўнік клуба «Традыцыя» Вікторыя Курто. Да нас нават завітаў міністр культуры Беларусі Анатолій Маркевіч.
Таццяна Петух, дырэктар Дома рамёстваў «Стары млын»:
— У «Горадзе майстроў» сёлета прапісаліся больш за 270 народных умельцаў не толькі з Беларусі, але і са Смаленска, з Вялікага Ноўгарада, Варонежа, Тальяці і іншых гарадоў. Майстры выстаўлялі ўпрыгажэнні са скуры, дрэва, саломкі, лазы, тэкстылю, бісеру і многае іншае. Я і Крысціна Брэская прадстаўлялі наш народны клуб майстроў на абласным свяце-конкурсе вышыўкі і карункапляцення «Чароўная нітка-2023». Мы ў раённым краязнаўчым музеі бралі этнаграфічныя артэфакты і на іх аснове рабілі рэканструкцыю. Атрымалася нядрэнна: работы ўдастоены дыплома лаўрэата I ступені і падарункавага сертыфіката на 70 рублёў, а таксама дыплома за развіццё і папулярызацыю тэкстыльных традыцый.
Іра Кузьміч, рэжысёр Варапаеўскага гарпасялковага Дома культуры:
— Міжнародны турнір нацыянальных танцаў «Танчым разам» сабраў амаль 300 беларускіх і расійскіх танцораў. Удзельнічалі і тры пары ад нашага Дома культуры. Вучні Варапаеўскай сярэдняй школы — актыўныя ўдзельнікі мастацкай самадзейнасці Таццяна Пяткоўская і Павел Кісялёў, Ліза Бодрая і Мікіта Кірэй — танцавалі разам з тымі, каму ад 16 да 30 гадоў, Людміла і Аляксандр Яршовы — з тымі, каму за 50. Лявоніху, польку, кракавяк і яшчэ больш за дзясятак танцаў яны вучылі на працягу некалькіх месяцаў. Затое як здорава было назіраць за парамі! Яны малайцы!
Ала Чарнюк, дырэктар раённага Дома культуры:
— На адкрыццё свята-конкурсу тэатра мод «Модны дывертысмент-2023» былі запрошаны хадулісткі ўзорнай цыркавой студыі «Каскад» раённага Дома культуры Вераніка Татыржа і Валерыя Раманоўская. Яны выклікалі вялікую цікавасць у гледачоў. І, як гэта было і на іншых святах, да нашых роставых мадэляў выстройвалася чарга, каб сфатаграфавацца з імі.
Ганна Маркава, старшыня прафсаюзнай арганізацыі вузла паштовай сувязі:
— Ад фестывальнага Віцебска засталіся незабыўныя ўражанні: эксклюзіўныя рэчы ў «Горадзе майстроў», таленавітыя маладыя выканаўцы, на канцэрце якіх мы прысутнічалі, «жывыя» скульптуры, яркія шоу і запальныя танцы. Усё гэта было магчыма ўбачыць падчас паездкі, якую амаль для 150 пастаўчан арганізавала раённае аб’яднанне прафсаюзаў.
Запісала Анна Анішкевіч
