Раз на месяц кіраўніцтва раённай вертыкалі адпраўляецца не толькі ў сельскія населеныя пункты, але і ў мікрараёны горада, каб правесці там прыёмы грамадзян. Такая форма работы вельмі зручная для людзей: ім не трэба ехаць у райвыканкам — вырашыць праблему можна на месцы. Звароты датычаць розных сфер дзейнасці: добраўпарадкавання тэрыторый, рамонту дарог і жылля, медыцынскага і гандлёвага абслугоўвання.
У панядзелак старшыня райвыканкама Сяргей Чэпік вёў выязны прыём у памяшканні раённага Дома культуры ў 5 гарадку. Праблемных пытанняў не было. А вось жыхарка мікрараёна прыйшла падзякаваць за абноўлены асфальт па дарозе да Дома культуры, за прыгажосць вакол самой установы, дзе любяць гуляць маладыя мамы з дзіцячымі каляскамі, бабулі з унукамі. Яны любуюцца дагледжанай тэрыторыяй, роскашшу кветак на ёй.
— Выязныя прыёмы — запатрабаваная форма работы са зваротамі грамадзян, — гаварыў Сяргей Чэпік. — Яны неабходныя і людзям, і нам, прадстаўнікам улады. Мы імкнёмся выслухаць тых, хто звяртаецца, унікнуць у сітуацыю, разабрацца ў ёй і дапамагчы. Адны пытанні магчыма вырашыць дастаткова хутка, іншыя патрабуюць часу на дэталёвае вывучэнне. Кіраўніцтва раёна заўсёды гатова да адкрытага і шчырага дыялогу. Зваротам грамадзян удзяляем шмат увагі. Аб эфектыўнасці такой работы сведчыць зніжэнне колькасці іх паступлення. Станоўчая тэндэнцыя сфарміравалася дзякуючы таму, што ў пастаўчан ёсць шырокія магчымасці для сустрэч з кіраўніцтвам. На сістэмнай аснове дзейнічаюць і такія формы работы з насельніцтвам, як прамыя тэлефонныя лініі, ажыццяўленне адміністрацыйных працэдур па прынцыпе «аднаго акна».
Анна Анішкевіч
