Органы ўнутраных спраў вядуць барацьбу са злачыннасцю, ахоўваюць грамадскі парадак, забяспечваюць грамадскую, асабістую і маёмасную бяспеку, абараняюць жыццё, здароўе, гонар, правы, свабоду і законныя інтарэсы грамадзян ад злачынных і іншых супрацьпраўных замахаў.
Оперупаўнаважаны крымінальнага вышуку — адна з найбольш адказных міліцэйскіх пасад. Дзякуючы шматлікім фільмам і серыялам вакол гэтай прафесіі створаны рамантычны арэол. Аднак дасканала ведаюць усе яе плюсы і мінусы толькі самі аператыўнікі. А іх будні вельмі адрозніваюцца ад кіношных. Гэта не пагоні са стральбой за злачынцамі, а штодзённая руцінная карпатлівая праца, у якой трэба ўмець камунікаваць з грамадзянамі, аналізаваць факты, заўважаць нават дробязі, хутка прымаць правільныя рашэнні.
Па лініі крымінальнага вышуку летась у раёне зарэгістравана 119 злачынстваў. Падазроныя ўстаноўлены ў 68,1% выпадкаў (па вобласці – у 63,7%)
— У нашы абавязкі ўваходзіць раскрыццё такіх злачынстваў, як крадзяжы, разбоі, грабяжы, нанясенне цяжкіх цялесных пашкоджанняў, забойствы, інтэрнэт-махлярствы, і іншых, — расказвалі старшыя оперупаўнаважаныя аддзялення крымінальнага вышуку крымінальнай міліцыі Пастаўскага РАУС Яўгеній Курыловіч і Яўгеній Чарэнка. — Прафесія вельмі патрэбная, а вось публічнасці стараемся пазбягаць. Кожная работа мае свае цяжкасці, але калі ёсць інтарэс да яе, то ўсё атрымліваецца.
Фаіна Касаткіна
