За аднаўленне электразабеспячэння — такім нагрудным знакам адзначана старанне пастаўскіх энергетыкаў на ліквідацыі наступстваў мінулагодняй ліпеньскай стыхіі.
Наш раён той ураган абмінуў. Ад яго пацярпелі амаль 250 населеных пунктаў у 15 раёнах Гомельскай і Магілёўскай абласцей. У тых рэгіёнах быў уведзены рэжым надзвычайнай сітуацыі. Да навядзення парадку падключылася ўся краіна. Рупіліся ратаўнікі, работнікі лясной гаспадаркі, прадстаўнікі энергасістэмы.
Не застаўся ў баку ад гэтай дабрачыннай справы і калектыў Пастаўскага раёна электрасетак. Першымі на дапамогу сваім калегам з Рэчыцкага РЭС адправіліся брыгады Ігара Пашкевіча і Юрыя Чарняўскага. Браты Ігар і Аляксей Пашкевічы дызельным генератарам забяспечвалі электрычнасцю адну з жывёлагадоўчых ферм, якая была поўнасцю абясточаная.
— Генератар працаваў круглымі суткамі, — расказвалі. — А мы сачылі, каб не здарылася перабояў, не парушаўся тэхналагічны працэс. Жылі ў машыне. Але ні на што не наракалі, бо ведалі: ферма павінна функцыянаваць.
Электраманцёры Аляксандр Радко, Дзмітрый Гайдэль, Аляксандр Ульянаў, Юрый Антаневіч адразу распачалі ўхіленне пашкоджанняў на лініях электраперадачы. Пад’ём спецыялістаў на вышыню забяспечваў аператар машыны з пад’ёмнікам Аляксандр Ківачук.
Праз тыдзень папярэднія брыгады змяніла брыгада Андрэя Літынскага ў складзе электраманцёраў Аляксандра Зубко, Антона Ражко, Уладзіслава Амбрасовіча, Паўла Пяткевіча і вадзіцеля Славаміра Савіча.
— Работы па аднаўленні падачы электраэнергіі спажыўцам вяліся кругласутачна паскоранымі тэмпамі ў экстрэмальных умовах, — успаміналі. — Энергетыкі рабілі ўсё магчымае, каб хутчэй вярнуць у працоўны рытм прадпрыемствы, даць людзям святло. Мы разумелі, што гэта бяда агульная і мы абавязаныя дапамагчы з ёй справіцца. Прыемна было, калі мясцовыя жыхары падыходзілі, дзякавалі за працу, некаторыя стараліся пачаставаць якімі-небудзь прысмакамі.
Апошняга спажыўца электраэнергіі падключылі на 17-ы дзень пасля разгулу стыхіі. Вярнуўшыся з камандзіроўкі, РЭСаўцы ўключыліся ў выкананне паўсядзённых задач, пастаўленых перад калектывам. А нядаўна іх чакаў сюрпрыз — узнагароджанне. Дзяржаўнае вытворчае аб’яднанне электраэнергетыкі «Белэнерга» ў знак удзячнасці ліквідатарам устанавіла нагрудны знак «За аднаўленне электразабеспячэння». Дырэктар філіяла «Глыбоцкія электрычныя сеткі» Алег Апяцёнак уручыў яго кожнаму пастаўскаму энергетыку, хто праявіў высокі прафесіяналізм і мужнасць у складанай нестандартнай сітуацыі.
Анна Анішкевіч
