Раніцай у мінулую суботу, нягледзячы на шэрае, дажджлівае надвор’е, у Паставах і іншых населеных пунктах раёна панаваў сонечны настрой. Школьнікі з букетамі кветак у руках, многія ў суправаджэнні бацькоў, спяшаліся ў свае ўстановы адукацыі на ўрачыстыя лінейкі, прысвечаныя заканчэнню навучальнага года. А вечарам таго ж дня выпускнікі 11-х класаў школ Пастаўшчыны сабраліся ў раённым Доме культуры на свята апошняга званка.
Дождж у дарогу — добры знак
Школьныя лінейкі аб’ядналі не толькі навучэнцаў, іх бацькоў і педагогаў. Ва ўсе ўстановы адукацыі завіталі ганаровыя госці: прадстаўнікі раённай улады, грамадскіх арганізацый, кіраўнікі прадпрыемстваў і ўстаноў. У Пастаўскую гімназію, дзе пабывала карэспандэнт «ПК», адправілася намеснік начальніка аддзела па адукацыі райвыканкама Таццяна Русалоўская.
Нягледзячы на тое, што апошні званок — свята для ўсіх школьнікаў, якія, стаміўшыся ад падручнікаў і ўрокаў, мараць пра канікулы і адпачынак, у цэнтры яго ўвагі традыцыйна знаходзяцца выпускнікі. Яны развітваюцца са школай, настаўнікамі і аднакласнікамі, кажуць «бывай» дзяцінству і ўступаюць у новае, дарослае, жыццё. Гімназію сёлета пакідаюць 24 11-класнікі і частка 9-класнікаў, якіх на дадзены момант 30. Іх выхад са сцен установы ў суправаджэнні класных кіраўнікоў Алены Пяткевіч і Наталлі Кундро гучнымі апладысментамі віталі прысутныя ў гімназічным двары. Да іх у першую чаргу звярнуўся дырэктар Славамір Каранеўскі. Ён пажадаў выпускнікам выдатна здаць экзамены, паступіць у тыя ВНУ і ССНУ, якія яны выбралі, а пасля атрымання прафесіі вярнуцца на Пастаўшчыну, каб прадоўжыць справу сваіх бацькоў, працай прыносіць карысць малой радзіме. А яшчэ — ніколі не забываць пра тых, дзякуючы каму мы ўжо 80 гадоў жывём пад мірным небам.
Роўнай, шчаслівай жыццёвай дарогі, вяртання на родную зямлю і, канешне ж, удачы на экзаменах, якія пачаліся ўжо ў гэты панядзелак, зычыла навучэнцам выпускных класаў Таццяна Русалоўская. Яна адзначыла, што нават прырода плача ад таго, што выпускнікі пакідаюць свае навучальныя ўстановы. З найлепшымі пажаданнямі да галоўных віноўнікаў урачыстасці звярнуліся іх малодшыя таварышы — першакласнікі. Было дадзена слова і самім выпускнікам. Юнакі і дзяўчаты прыгадалі свае школьныя гады, шчыра падзякавалі настаўнікам за атрыманыя веды і ўручылі ім кветкі.
Яркім момантам свята стаў развітальны школьны вальс 11-класнікаў, перад якім яны дружна адпусцілі ў неба паветраныя шары са сваімі марамі і спадзяваннямі. Не абышлося і без апошняга званка. Яго далі Аляксандр Касцень і першакласніца Каця Аўсяная. А калі выпускнікі пакідалі школьны двор, дождж, які на час лінейкі амаль спыніўся, пайшоў з новай сілай. У народзе кажуць, што гэта добры знак, калі наперадзе жыццёвыя змены. Значыць, у сёлетніх выпускнікоў усё павінна скласціся найлепшым чынам.
Больше фото в группах в ОК и ВК
Фото Натальи Налей и Елены Шаповаловой
