Пакуль большасць атрымлівалі асалоду ад бесклапотнага лета, хлопцы і дзяўчаты з вытворчага студэнцкага атрада «Маладзёжны» імя Героя Савецкага Саюза Васіля Аляксеевіча Сідарэнкі дакладна ведалі: гэты час можна і трэба выкарыстаць для карыснай працы і добрага заробку.
Дзесяць юнакоў і дзяўчат ва ўзросце ад 16 гадоў — Антон Грачанік, Даніла Казаровец, Лізавета Копелева, Паліна Кошалева, Марк Палякоўскі, Аляксандр Лейша, Вікторыя Зелянкевіч, Дзяніс Сцяпанаў, Вадзім Турла і Міхаіл Шуранаў — скончылі сваю першую працоўную змену на ААТ «Паставымэбля». Нягледзячы на ўяўную руціну, зборка мэблі патрабавала ад іх асаблівай уважлівасці і дакладнасці, з’яўляючыся найважнейшым этапам у вытворчым ланцужку прадпрыемства.
Юныя памочнікі завадчан не проста працавалі — яны ўкладвалі ў работу душу. На працягу сямігадзіннай змены скрупулёзна выконвалі серыю аперацый. Кожны рабочы дзень быў для іх важным этапам на шляху да паўнавартаснага самастойнага жыцця. Стараннасць і адказны падыход да справы маладых людзей атрымалі высокую ацэнку: як кіраўніцтва прадпрыемства, так і раённы лідар БРСМ аднадушна выказваюць задавальненне вынікамі работы студатрадаўцаў.
А вось што гаворыць выпускніца сярэдняй школы №2 імя Н. М. Асяненкі Паліна Кошалева:
— Гэтае лета я правяла па-асабліваму. Замест звычайнага адпачынку вырашыла папрацаваць і ўступіла ў студэнцкі атрад «Маладзёжны». Гэта быў мой першы сур’ёзны вопыт. Амаль месяц, з канца чэрвеня да канца ліпеня, мы працавалі на прадпрыемстве. Спачатку думала, што будзе сумна, але работа аказалася цікавай. Трэба было сачыць за кожнай дробяззю. Дакладнасць неабходна ўсюды. Немалаважна тое, што працаўладкаванне з’яўляецца афіцыйным і залічваецца ў працоўны стаж.
Яўгенія Дзянісава, студэнтка Белдзяржуніверсітэта
