Гарадскі пасёлак Лынтупы ўключаны ў абласную праграму добраўпарадкавання малых гарадоў. У населеным пункце ідзе асфальтаванне вуліц, рамонт аб’ектаў сацыяльнай сферы, абнаўленне прыдамавых тэрыторый. На мінулым тыдні ходам работ пацікавіўся старшыня райвыканкама Сяргей Чэпік.
У абноўленую школу
На пад’ездзе да трохпавярховага будынка лынтупскай школы ў той дзень дарожнікі ДЭУ-33 абнаўлялі асфальт. Сам будынак, дзе размяшчаецца і дзіцячы сад, прыцягвае ўвагу новымі вокнамі. У красавіку іх замянілі больш за 80. А ўсяго тут 150 акон.
— Пасля гэтага захацелася асвяжыць класы, калідоры, — расказвала дырэктар Лынтупскай СШ Наталля Кузьмінова. — У работу ўключыліся педагогі, тэхнічныя работнікі. Не засталіся ўбаку бацькі. Працавалі члены вытворчай брыгады, у склад якой уваходзілі старшакласнікі. Агульнымі намаганнямі абнавілі столь, сцены, падлогу. Завяршаюцца работы па рамонце даху.
Сяргей Чэпік прайшоў па класах, заглянуў у падсобныя памяшканні і санвузлы. Работы яшчэ не скончаныя. У адным з пакояў дзіцячага сада таты збіралі новыя ложкі, у гардэробе манціравалі вешалкі, дзесьці дафарбоўвалі дзверы. Электрыкі падключалі свяцільні. З дня на дзень павінны ўстанавіць сантэхніку.
Прыемна было зайсці ў сталовую. Светлае прасторнае памяшканне хоць сёння гатова да работы.
— Прыязджайце да нас на свята першага званка! — запрашала дырэктар. — Тады ўбачыце ўсю прыгажосць не толькі ў будынку школы, але і на стадыёне. Чакаем пастаўкі варкаўт-пляцоўкі, гульнёвага комплексу для дзіцячай пляцоўкі садка.
Свежа і ўтульна
Даўно не было рамонту ў Лынтупскім гарпасялковым Доме культуры. Сёлета абнавілі яго фасад, зрабілі адмостку, устанавілі трубы-ліўнёўкі, на ганак паклалі плітку, памянялі дзверы. Прыгожа выглядае глядзельная зала. Завяршаецца касметычны рамонт у іншых кабінетах.
— У нас працуе некалькі гурткоў, — расказвала загадчыца ўстановы культуры Анжэла Кухальская. — У іх займаюцца і дарослыя, і дзеці. Кожны знаходзіць занятак па інтарэсах. Мы цесна супрацоўнічаем з камандаваннем пагранічнай заставы «Лынтупы». Ваеннаслужачыя у нас — частыя госці. Ладзім з імі шмат сумесных мерапрыемстваў. Дзецям асабліва даспадобы спартыўныя спаборніцтвы. Пасля рамонту лынтупчанам будзе больш прыемна прыходзіць у абноўнены будынак. Дзякуй раённай уладзе за ўвагу да ўстаноў культуры.
Цяплей стане ў мясцовай бібліятэцы, якая размяшчаецца на першым паверсе сельвыканкама.
— Сёлета мы тут памянялі 7 акон, — расказваў старшыня Лынтупскага сельвыканкама Аляксандр Макаранка. — Асноўны ж аб’ём работ выкананы ў школе. Абнаўляюцца вуліцы гарпасёлка. Там працуюць работнікі ДЭУ-33 і УП ЖКГ. У асфальт апранулі вуліцу Марата Казея. Цяпер работы вядуцца на Лясной. На чарзе — вуліца Гагарына і завулак Красільнікава.
За сродкі, выдзеленыя з бюджэту, зроблены рамонт і ў Лынтупскай участковай бальніцы.
— Лынтупы — населены пункт з багатай гісторыяй, — гаварыў Сяргей Чэпік. — Тут зарэгістравана каля 1 300 чалавек. Большасць домаўладанняў дагледжаныя. Каля дамоў акуратныя агароджы, цвіце шмат кветак. Тое, што пасёлак уключаны ў праграму па добраўпарадкаванні малых гарадоў і з абласнога і раённага бюджэтаў выдзелена больш за 1 мільён 300 тысяч рублёў, сведчыць пра клопат дзяржавы пра такія населеныя пункты. 1 верасня ў школу прыйдуць больш за 100 вучняў, 20 дзетак наведваюць сад. На лынтупскай зямлі пачалі ўзвядзенне сучаснай малочнатаварнай фермы. Туды будуць патрэбны спецыялісты, аператары, іншыя работнікі. Спадзяёмся, што на новую ферму прыйдуць працаваць не толькі мясцовыя грамадзяне, але і з іншых месцаў. У перспектыве запланавана будаўніцтва жылля. Мы абавязаны зрабіць усё магчымае для павышэння якасці жыцця гарпасялкоўцаў.
Анна Анішкевіч
