На Варапаева – у аб’езд. Прычына для гэтага ўважлівая – рэканструкцыя моста
Рух па дарозе Юнькі—Варапаева—Мярэцкія, якую абслугоўвае Пастаўскае ДРБУ-132, ажыўлены. Мост праз раку Палавіцу, што знаходзіцца бліжэй да Навасёлак, пабудаваны даўно і парадкам знасіўся. Таму, пасля таго як збудаванне абследавалі спецыялісты, было прынята рашэнне аб яго рэканструкцыі. Яна жыццёва неабходная для забеспячэння бяспекі дарожнага руху.
Тры гады таму пачалася распрацоўка праектнай дакументацыі. Справа зацягнулася, і толькі ў жніўні тут распачалі падрыхтоўчыя работы. Тыя, хто карыстаецца гэтай дарогай, цяпер маюць часовыя нязручнасці: вымушаны ехаць у аб’езд.
— Рэканструяваць мост будзем сваімі сіламі, — расказваў галоўны інжынер ДРБУ-132 Віктар Даўгель. — Зараз брыгада прараба Андрэя Рагіні вядзе падрыхтоўку да асноўнага этапа работ. Згодна з праектам, карчуем хмызнякі, здымаем раслінны грунт, дэманціруем старыя канструкцыі і вывозім друз. Работа ў асноўным механізаваная, людзей пакуль што тут працуе мала. А калі пачнецца асноўны этап, рабочых рук дабавім.
У перспектыве тут будзе пакладзена 26-метровая труба дыяметрам 3,2 метра. Зверху яе засыпяць пяском і шчэбенем, зробяць бетонныя адкосы, установяць бар’ерную агароджу, участак заасфальтуюць і добраўпарадкуюць прылеглую тэрыторыю. Згодна з планам, мост павінен быць уведзены ў эксплуатацыю 10 лістапада.
Абнаўляюцца і некаторыя ўчасткі асфальта на дарозе ад Слабады да Варапаева. Укладкай палатна займаецца брыгада майстра Віктара Вырвіча. У верасні прадоўжацца работы па абнаўленні дарожнага палатна на ўчастку ад вёскі Жукі да Навасёлак.
Анна Анішкевіч
