Перад кожным вучнем, які заканчвае школу, абавязкова паўстаюць пытанні: кім быць? дзе вучыцца? як паступіць? Знайсці адказы на іх дапаможа «Дзённік прафесійнага самавызначэння», распрацаваны Міністэрствам адукацыі Рэспублікі Беларусь.
Дзённік — гэта своеасаблівы навігатар у свеце прафесій. З ім можна правесці самааналіз (зразумець свае інтарэсы, здольнасці, каштоўнасці і нават улічыць стан здароўя), вывучыць свет прафесій (ад інжынераў і ўрачоў да повараў, цырульнікаў і ІТ-спецыялістаў), супаставіць свае якасці з патрабаваннямі прафесіі (наколькі яна падыходзіць характару і мэтам), а таксама скласці дакладны план ад паступлення да кар’ернага росту. Карысныя парады па гэтых пунктах утрымліваюцца ў раздзеле «Як выбраць прафесію».
У дапаможніку змешчаны QR-код спецыялізаванага сайта для абітурыентаў Абитуриент.by, дзе можна атрымаць інфармацыю пра тое, у якіх установах адукацыі Беларусі вядзецца падрыхтоўка па выбраных спецыяльнасцях, і параўнаць свае паказчыкі пры паступленні з прахаднымі баламі мінулых гадоў. Маюцца таксама спасылкі на інтэрактыўныя даведнікі для тых, хто паступае ў каледжы Беларусі, і для выпускнікоў профільных класаў прафесійнай накіраванасці. Расказваецца, якія спецыялісты сёння асабліва запатрабаваныя ў нашай краіне і ў чым перавага рабочых прафесій. Акрамя таго, школьнікам прапануецца прайсці спецыяльна распрацаваны «ПрофіТэст», каб разабрацца ў сабе, выявіць моцныя бакі і вызначыць прафесію, якая ідэальна падыдзе канкрэтна кожнаму.
«Дзеннік прафесійнага самавызначэння» даступны для спампоўвання на сайце Міністэрства адукацыі краіны.
Падрыхтавала Алена Шапавалава
