Дыплома I ступені на абласной выставе-конкурсе вышыўкі па сетцы «Перавіць» у намінацыі «Лепшая калекцыя артэфактаў» удастоена загадчык Дома рамёстваў «Стары млын» Таццяна Петух.
— Развіццю гэтага віду творчасці паслужыла звычайная рыбалоўная сетка, — расказвала Таццяна Мікалаеўна. — Спачатку яе цыравалі, потым сталі ўпрыгожваць рознымі ўзорамі і арнаментамі. Герб Пастаў таксама зроблены на рыбацкай сетцы. Гэтай тэхнікай я захапілася даўно. Маю цэлую калекцыю розных работ. Акрамя ўласна створаных, некаторыя набывала, некаторыя мне прывезлі ад сваіх бабуль, прабабуль мае сябры, знаёмыя.
Пры падрыхтоўцы да выставы дапамаглі работнікі раённага краязнаўчага музея, дзе захоўваюцца ўнікальныя старажытныя рэчы, выкананыя ў тэхніцы «перавіць». Два пано зрабіла член Беларускага саюза майстроў народнай творчасці Крысціна Брэская.
Разглядаецца магчымасць уключэння тэхнікі «перавіць» у спіс нематэрыяльных гісторыка-культурных каштоўнасцей Беларусі.
Падрыхтавала Анна Анішкевіч
