Нягледзячы на пераменлівае надвор’е, аграрыі не збаўляюць тэмпаў на сяўбе яравых зерневых і зернебабовых, падкормцы азімых, іншых работах. А каб яны спорыліся, працаўнікам патрэбна рацыянальнае харчаванне.
Сельгаспрадпрыемства «Дунілавічы-агра» — адно з найбольшых па плошчы сельгасугоддзяў у раёне. На веснавых палявых работах мясцовым хлебаробам значную дапамогу аказваюць механізатары малочнага завода. Усе задзейнічаныя ў полі з дня старту пасяўной забяспечаны гарачым харчаванне і падвячоркамі.
У сераду повар Марына Васільева з раніцы прыгатавала больш за 30 порцый баршчу, катлет з грэцкай кашай. Расклала абеды ў тэрмасы, запакавала хлеб, неабходны посуд. Вадзіцель Радзівон Мішута з раздатчыцай абедаў Рэяй Васінай загрузілі ўсё ў машыну і адправіліся ў поле, дзе механізатары рыхтавалі глебу, сеялі пшаніцу. Тэхніка раскідана па палях, таму за дзень машына з абедамі праязджае не адзін дзясятак кіламетраў.
У сталовую прыйшлі тыя, хто рамантуе тэхніку ў майстэрнях. Накарміўшы іх, Марына памыла посуд і чакала прыходу яшчэ некалькіх чалавек з фермы. Раскладвала ім падвячоркі.
— Пакуль працуе толькі наша сталовая, — гаварыла повар. — Пачнецца пашавы перыяд — будзем карміць пастухоў. Тады распачне работу і сталовая ў Ляхаўшчыне.
Прадукты для прыгатавання страў СП «Дунілавічы-агра» набывае ў магазіне малочнага завода. Меню повар складае сама. Яно разнастайнае. Усё стараецца прыгатаваць смачна. Працуе Марына Васільева пяты сезон па дагаворы з 1 красавіка па 1 лістапада. Сёлета вясна на дунілавіцкія землі прыйшла раней, а разам з ёй распачала работу і повар.
Смачны гарачы абед, своечасова дастаўлены ў поле, — гэта не проста сацыяльная гарантыя, гэта павага да працы аграрыяў. Таму пытанне харчавання хлебаробаў пастаянна знаходзіцца на кантролі райкама прафсаюза работнікаў аграпрамысловага комплексу, спецыялістаў райЦГЭ.
Летась у дунілавіцкай сталовай абнавілі посуд, дакупілі неабходны кухонны інвентар.
Гутарыла з Марынай Васільевай — і разумела: не маю права марнаваць яе час, бо повару неабходна рабіць нарыхтоўкі на наступны дзень.
Анна Анішкевіч
