Сёння канцэртная зала па вул. Чырвонаармейскай напоўнілася асаблівай цеплынёй. Старт юбілейнаму фестывалю дала літаратурна-музычная вечарына «Паэтычнае слова на далонях жанчыны», дзе аматары мастацтва сваёй творчасцю ўслаўлялі галоўную гераіню года — беларускую жанчыну. Сцэна стала люстэркам жаночай душы, у якім адбіваліся самыя патаемныя пачуцці. Гучалі вершы пра каханне, мацярынства, мудрасць і непаўторную прыгажосць. Гледачоў парадавалі сваёй творчасцю вядомыя мясцовыя паэты Ігар Пракаповіч і Уладзімір Свірковіч. А лірычную атмасферу стваралі музычныя нумары вакальнага гурта «Вдохновение».
Яркім момантам мерапрыемства стала выступленне ўдзельнікаў літаратурнай студыі «Світанак» Цэнтра культуры і народнай творчасці Пастаўскага раёна. Яе ўдзельніцы — Марына Трушына, Марына Кавалёнак, Вольга Лісіцкая, Святлана Аліхвер, Лідзія Стрылец, Таццяна Куцуха, Людміла Малевіч, Наталія Карнілава — прадставілі слухачам гумарыстычную і шчырую паэзію, прысвечаную розным узростам і жыццёвым ролям жанчыны — ад дзяўчынкі да маці.
Завяршылася імпрэза прэм’ерным чытаннем верша-прысвячэння самому фестывалю (аўтар — Марына Кавалёнак), пасля чаго начальнік аддзела культуры райвыканкама Ірына Лойка ўручыла ўсім артыстам падзякі за асабісты ўклад у культурнае жыццё Пастаўшчыны. Вечарына стала выдатным напамінам пра тое, што менавіта жанчына з’яўляецца крыніцай натхнення і захавальніцай найлепшых традыцый.
Больше фото в группах в ОК и ВК
Крысціна Рубель
