Чэмпіянат Беларусі па валейболе
Задача – быць у фінале
Двухразовы чэмпіён і шматразовы прызёр у другім па моцы дывізіёне беларускага валейбола — пастаўскі «Атлант» — хутка згуляе на нацыянальным узроўні. Пачнецца сезон з розыгрышу Кубка Беларусі, а першы тур першынства краіны 10—11 кастрычніка пройдзе ў Мінску, Магілёве і Паставах. Удзел у ім на пляцоўцы ФАКа прымуць гродзенскі «Легіён-2», віцебскае «Марка-ВДТУ-2» і ДЮСШ ВК «Брэст». Наша каманда актыўна рыхтуецца да спаборніцтваў, паралельна з трэніроўкамі выязджала на спарынгі ў сталіцу, дзе праверыла сваю гатоўнасць у кантрольных паядынках з юніёрскай зборнай Беларусі (U-20) і клубам вышэйшай лігі — ВК «Мінск» .
19 верасня нашы згуляюць у групе «А» на папярэднім этапе розыгрышу Кубка Беларусі сярод мужчынскіх каманд. Усяго правядуць 4 матчы. Самым строгім экзаменатарам стане віцэ-чэмпіён краіны — ВК «Сталіца».
А ў чэмпіянаце краіны ў першай лізе за ўзнагароды будуць змагацца 11 каманд у два кругі з турамі ў розных гарадах. Матчы 3-га тура пройдуць у Паставах у сярэдзіне лістапада, 11-га і заключнага 12-га — вясной будучага года. Выязныя гульні «Атланта» на турах у Гомелі, Магілёве, Брэсце, Мінску і Віцебску аматары валейбола змогуць убачыць у прамой трансляцыі на YouTube.
У папярэднім першынстве пастаўчане пры вострай канкурэнцыі выступілі паспяхова, выйгралі 14 з 20 праведзеных сустрэч і выйшлі ў фінал чатырох найлепшых каманд, стаўшы пяціразовым сярэбраным прызёрам.
«Атлант» зноў ставіць задачу прабіцца ў першую чацвёрку. Касцяк каманды захаваўся. Усяго заяўлена 23 ігракі, з іх сямёра — дзеючыя кандыдаты ў майстры спорту. Каманда прыкладзе ўсе намаганні, каб радаваць балельшчыкаў прыгожай камбінацыйнай гульнёй і запрашае падтрымаць наш клуб на матчах нацыянальнага чэмпіянату як дома, так і на выездзе.
Уладзімір Шык
