Дарагія браты і сёстры, шаноўныя жыхары Пастаўшчыны! Ад усяго сэрца запрашаю вас раздзяліць з намі радасць вялікай парафіяльнай урачыстасці — фэсту ў гонар Святога Арханёла Міхала! Гэта свята веры, еднасці і супольнай малітвы.
Святы Арханёл Міхал — нябесны апякун нашай парафіі. Ён з’яўляецца сімвалам мужнасці, вернасці Божай праўдзе і перамогі святла над цемрай. У гэты святочны дзень, збіраючыся разам каля алтара, мы будзем узносіць малітвы да Бога праз заступніцтва нашага магутнага апекуна. Хрысціянская традыцыя заклікае нас прасіць у яго абароны ад духоўных небяспек, а таксама благаслаўлення для кожнага чалавека. У нашы дні асабліва важна маліцца за мір, узаемаразуменне і згоду на нашай зямлі, аздараўленне чалавечых сэрцаў, зняволеных нянавісцю ці трывогай.
Свята адбудзецца ў суботу, 26 верасня, у варапаеўскім касцёле. Урачыстая святая Імша пачнецца ў 12 гадзін.
Запрашаю кожнага з вас знайсці час сярод штодзённых клопатаў, каб духоўна ўзбагаціцца і адчуць прыгажосць хрысціянскага братэрства. Фэст — гэта цудоўная магчымасць аднавіць сілы, сустрэцца з блізкімі і адкрыць сэрца для Божай ласкі.
Няхай супольная малітва і заступніцтва Святога Міхала Арханёла прынясуць у вашыя дамы супакой і радасць! Шчыра чакаю сустрэчы з кожным з вас. Прыходзьце самі і запрашайце сваіх родных, суседзяў і сяброў. Дзверы нашай святыні і нашыя сэрцы адкрыты для кожнага чалавека добрай волі!
Ксёндз Аляксей Вянцкевіч, пробашч парафіі Святога Міхала Арханёла ў Варапаеве
