У кожнага населенага пункта ёсць свой адмысловы рытм, унутраны гадзіннік, па якім звяраюць жыццё мясцовыя жыхары. Для Варапаева і навакольных вёсак такім пунктам адліку даўно стаў чацвер, кірмашовы дзень. Гэта дзесяцігадовая традыцыя, якая ў эпоху інтэрнэту і супермаркетаў чамусьці не знікае, а, наадварот, набывае новую глыбіню.
У чацвер людзі чакалі больш шырокага маштабу, бо прачыталі ў раёнцы, што тут будзе сельскагаспадарчы кірмаш. Спадзяваліся, што гаспадаркі раёна прывязуць сваю прадукцыю, а работнікі культуры зладзяць святочны канцэрт. Чаканні апраўдаліся часткова. Бульбай і зернем гандлявалі пераважна тыя, хто вырасціў лішкі на прысядзібных участках.
Зрэшты, сумаваць наведвальнікам не давялося. Смутак ад адсутнасці грузавых машын рассеяўся сапраўдным восеньскім буйствам фарбаў. Выбар саджанцаў пладовых дрэў, асенніх кветак заварожваў. Іх прывезлі з недалёкіх ад Варапаева Вайцяхоў, а таксама з Докшыцкага і Глыбоцкага раёнаў. Пакупнікі набывалі кветкі, каб зрабіць свае падворкі прыгажэйшымі. Асобным цэнтрам прыцягнення сталі госці з Глыбоцкага раёна — гаспадары знакамітай пасекі «Пчаліны рай» з вёскі Гірстуны. Попыт на іх бурштынавы мёд быў вялікі. Стаяла чарга па прадукцыю гандлёвай маркі «Паставы-гарадок» каля аўтамагазіна малочнага завода.
На кірмашы сустрэла шмат знаёмых варапаеўцаў. Яны адзначылі, што кірмаш гэтага дня мала чым адрозніваецца ад папярэдніх. Але галоўная каштоўнасць варапаеўскага чацвярга — гэта камунікацыя: ён ратуе чалавека ад адзіноты. У час, калі мы заліпаем перад экранамі тэлевізараў і ў смартфонах, варапаеўскі пляц застаецца жывой сацыяльнай сеткай, дзе замест лайкаў — цёплы поціск рукі і шчырая ўсмешка. Тут абмяркоўваюць навіны, плануюць розныя сумесныя справы, даюць парады па агародніцтве. Чалавеку патрэбен чалавек, і менавіта на кірмашы гэта адчуваецца найбольш цёпла. Радасць ад сустрэчы — вось галоўны тавар, які тут раздаецца абсалютна бясплатна і ў неабмежаванай колькасці.
Восеньскі кірмашовы марафон на Пастаўшчыне толькі набірае абароты. 27 верасня — сельскагаспадарчы кірмаш у Паставах. Там, безумоўна, і маштаб будзе іншы, і выбар тавараў шырэйшы. Сельгаспрадпрыемствы прывязуць сваю прадукцыю, а таксама выступяць творчыя калектывы.
Анна Анішкевіч
