Пры нашым касцёле Святога Антонія Падуанскага ўжо даўно функцыянуе развітальная капліца. Гэта асаблівае месца, дзе ўстанаўліваюць труну з целам нябожчыка перад яго пахаваннем. Менавіта сюды прыходзяць родныя, блізкія, знаёмыя і сябры памерлага, каб у цішыні і сумеснай малітве прасіць Усявышняга аб супакоі душы дарагога чалавека. У капліцы яны праводзяць нямала часу, застаючыся сам-насам са сваімі думкамі і малітвамі, шукаючы духоўнай падтрымкі.
Раней пакой быў абсталяваны драўлянымі лаўкамі. Аднак вельмі хацелася зрабіць гэта месца больш утульным і камфортным, каб людзі, знясіленыя горам, маглі знайсці тут хоць якую-небудзь палёгку падчас доўгіх гадзін развітання.
Нядаўна гэта патрэба была цалкам вырашана дзякуючы спонсарскай дапамозе дырэктара Пастаўскага мэблевага цэнтра Анатолія Бабічава: зараз замест лавак тут устаноўлены сучасныя зручныя крэслы.
Ад імя ўсіх вернікаў, асабіста ад сябе і кожнага, хто ў хвіліну смутку будзе знаходзіцца ў нашай капліцы, выказваю шчырую ўдзячнасць Анатолію Міхайлавічу за яго чуласць, разуменне і высакароднасць. Ваша дапамога — гэта неацэнны ўклад у падтрымку духу нашых парафіян у самыя цяжкія моманты іх жыцця. Як важна, што сярод нас ёсць тыя, хто здольны не проста спачуваць чужому гору, а здзяйсняць добрыя справы. І гэты ўчынак Анатолія Бабічава з’яўляецца прыкладам высокай сацыяльнай адказнасці, духоўнай сталасці і сапраўднай хрысціянскай любові да бліжняга. Дапамога ў абуладкаванні месца развітання з памерлымі — справа, якая заслугоўвае асаблівай павагі і Божага благаслаўлення.
Шчыра дзякуем таксама ўсяму калектыву Пастаўскага мэблевага цэнтра за стыльную і якасную прадукцыю. Няхай міласэрны Бог шчодра благаславіць Анатолія Бабічава, яго сям’ю і ўвесь калектыў прадпрыемства, а заступніцтва Святога Антонія заўсёды спадарожнічае ім на жыццёвым шляху!
З павагай і малітвай ксёндз-пробашч Вадзім Прасяной
