Да суседзяў – на форум
6 красавіка адбыўся другі этап V абласнога форуму працоўнай моладзі Віцебскай вобласці. Ён праводзіўся ў суседнім, Браслаўскім, раёне і быў прысвечаны Году гістарычнай памяці.
На форум накіравалася і дэлегацыя з Пастаўшчыны. У яе склад увайшлі першы сакратар райкама БРСМ Кацярына Малевіч, настаўнік англійскай мовы СШ №4 Караліна Рагіня, выхавальнік дзіцячага садка №2 Кацярына Паўлава, інжынер-тэхнолаг Пастаўскага малочнага завода Юлія Гайлеўская і правізар цэнтральнай раённай аптэкі №78 Вольга Кунц.
Моладзь наведала Відзаўскі дзяржаўны прафесійна-тэхнічны каледж, вытворчы філіял «Браслаўрыба» Глыбоцкага мясакансервавага камбіната, гімназію, аглядавую пляцоўку на гары Маяк, іншыя аб’екты. У праграме форуму таксама была экскурсія ў мясцовы музей традыцыйнай культуры, дзе ладзілася культурна-забаўляльная праграма. Падчас яе ўсе ўдзельнікі сумесна стваралі агульную маляванку і ляльку-абярэг.
У той дзень прайшоў і маладзёжны патрыятычны флэшмоб. А завяршылася мерапрыемства адкрытым дыялогам «Адзінства. Спадчына. Памяць», на якім падвялі вынікі сустрэчы і абмеркавалі актуальныя для моладзі тэмы.
Іна Сняжкова
Фота даслала Кацярына Малевіч
