Шчаслівы шок
Пастаўчанка Людміла Логінава прыняла ўдзел у міжнародным музычным праекце «Ты – супер! 60 +» і стала адным з васьмі фіналістаў.
Людміла Леанідаўна — педагог, 39 гадоў выкладае спевы і музыку ў СШ №1. Яна апантаны творчасцю чалавек. Іграе на фартэпіяна і гітары, піша песні, у тым ліку на словы мясцовых аўтараў. Пранікнёна спявае ў коле сяброў і на сцэне. Перад кожным выступленнем неймаверна хвалюецца.
— Удзельнічаць у такім папулярным музычным шоу ніколі не адважылася б, — прызнаецца. — Але сяброўка Галіна Гур’ева запоўніла ад майго імя анкету і адправіла яе ў тэлекампанію НТБ. Адтуль мне паступіла прапанова паўдзельнічаць у кастынгу, які праводзіўся анлайн. У ім прымалі ўдзел не сотні, а, напэўна, больш за тысячу чалавек! Адабралі 43-х, у іх ліку была і я. Ці варта гаварыць, з якім хваляваннем ехала ў Маскву?..
Сціплая настаўніца з правінцыйнага гарадка амаль на паўтара месяца трапіла ў зусім іншую, тэлевізійную, атмасферу. Зазначае, што было цяжка, але не завастрае на гэтым увагі. Расказвае: «З намі працавалі маладыя, але вельмі таленавітыя настаўнікі. Да ўсіх удзельнікаў ставіліся вельмі добразычліва. Ды і ўсёй камандзе, якая займалася праектам, хачу сказаць вялікі дзякуй».
…І вось Людміла Логінава выходзіць на вялікую масфільмаўскую сцэну, дзе вёўся запіс шоу, з песняй «Сто часов счастья». З першых акордаў пастаўчанка так уражвае зоркавых суддзяў, што ўсе чацвёра адразу ж націскаюць на зялёныя кнопкі. Калі песня сціхае, гледачы скандзіруюць: «Маладзец! Маладзец! Маладзец!» А вось што гавораць суддзі. Сусветна вядомы оперны спявак Ільдар Абдразакаў: «Здорава! Дзякуй вашай сяброўцы і вам. Вы — герой!» Стас П’еха: «Надзвычай складаная песня. У ёй шмат сэнсаў. І яе трэба пражыць па-акцёрску. У вас гэта быў спектакль». Ірына Дубцова: «Песню выконвалі такія вялікія спявачкі, як Ала Пугачова, Тамара Гвердцытэлі, Ірына Оціева. Яна падуладная толькі суперталенавітым. Вы выглядаеце такой маладой! І ў вас малады тэмбр голасу». Валерыя расчулілася да слёз, а потым выйшла на сцэну і праспявала разам з Людмілай. Пасля іх нечаканага дуэта — у зале зноў шквал апладысментаў.
— І ўсё ж чаму такая складаная песня? — пытаюся ў Людмілы Логінавай. — Настаўнікі прапанавалі?
— А мне не цікава выконваць нескладаныя творы, — адказвае яна. — Песню выбрала сама і вельмі ўдзячная настаўнікам, што яны даверылі яе мне. Гэта вялікі падарунак. Удзел у праекце стаў для мяне незабыўнай падзеяй, а выхад у фінал — увогуле шчаслівым шокам! Я зусім не спадзявалася на гэта.
Эмоцыі зашкальвалі не толькі ў Людмілы, але і ў нас, яе землякоў. Пасля трансляцыі шоу па тэлебачанні і размяшчэння роліка ў інтэрнэце на нашу зорку абрынуўся шквал віншаванняў і захапленняў ад знаёмых і незнаёмых. Усе яны зводзіліся да адной высновы: Людміла Логінава — супер!
Трансляцыя фіналу тэлешоу чакаецца ў сярэдзіне гэтага месяца. Не сумняваюся, што мы зноў атрымаем асалоду ад выступлення нашай таленавітай зямлячкі. Сачыце за праграмай НТБ.
Фаіна Касаткіна
Фота даслала Людміла Логінава
Видео телеканала НТВ
